Договорното производство на органска пиперка продолжува и оваа година. Според изјавите на преработувачите, успешноста на проектот ќе биде уште поголема доколку, покрај домашниот органски пипер, можат да набават и органско масло за готвење, наместо да го увезуваат.
За таа цел одлучивме да го прошириме проектот и со Договорно производство на органски сончоглед кој ќе се преработи во масло за потребите на преработувачките капацитети кои ќе се одлучат да произведуваат органски ајвар.
Првата асоцијација за сериозна компанија која се занимава со преработка на масло од домашни земјоделски култури, беше „Агрофила“ од Штип. Реномирана компанија, докажана по својот квалитет и партнерски однос кон земјоделските производители.
Разговараме со сопственикот на Агрофила – Саша Митрев за договорното органско производство и воопшто за развојот на овој бизнис кај нас.
„Договорното земјоделство мислам дека е иднината на нашето, македонско земјоделство. Така беше и порано во еден друг систем, кога се договараа за производството земјоделците и преработувачите, ама мислам дека тоа е иднина и за нас, затоа што без тоа не може да се произведува за непознат купувач. Тоа може да биде за една година, за две години и после ќе имате проблеми како земјоделски производители. Мислам дека тоа да се стимулира од страна на Министерството, да се контактираат фирмите да не купуваат производи, полупроизводи од странство, суровина исто така, ако може да се набави овде кај нас, рече Митрев.
„Ние го практикуваме веќе десетина години, зашто видовме дека има големи предности, знаеме каде се произведува, кој го произведува, значи во тој синџир од самиот земјоделски производител до супермаркетот со следење на стандардите можеме да го следиме производот од нива па до трпеза. На тој начин ја знаеме суровината, знаеме каде се произведува, кој ја произвел, каков е квалитетот. Во нашето поднебје има одлични производители само се несигурни со пласманот. „Агрофила“ како фирма долги години го практикува договорното земјоделство. Произведуваат за „Агрофила“ и се затвора целиот циклус. Мислам дека за многу гранки треба тоа да се практикува – потенцира Митрев и ни раскажа за тоа каква е соработката со земјоделците и кои се земјоделски култури ги откупуваат и преработуваат.
„Ние почнавме со сончоглед, проширивме со маслодајна репка, правевме експерименти со лен. Ленот неколку години договорно се произведува на неколку договорни стопанства и сѐ е потрошено во Македонија, речиси сѐ е потрошено на македонскиот пазар и ние знаеме каде се произведува тој лен и нашите купувачи се задоволни.
Ние не сме некоја којзнае колку голема фирма, тоа што има потреба уште не може да се задоволи со договорното производство. Но мислам дека се движат работите на подобро, да се договараме 100% да бидеме покриени уште во февруари кога почнуваме со плановите за претстојната година, во март кога ќе се посее сончогледот да знаеме што ќе се добие и да не чекаме септември и октомври неизвесност каква ќе биде цената.
Најголем проблем е цената, затоа што ние ги правиме калкулациите со земјоделците на одредена цена. Така и правевме до минатата година. Ја дефиниравме цената уште во март. Значи уште непосеан сончогледот, тие ја знаеја цената која ќе биде. Таа се движеше и беше стабилна, со исклучок на оваа година, кога се случи големо пореметување на пазарот и цената веќе не може да се дефинира. Да речеме, сончогледот се движеше некаде околу 19-20 денари, а оваа година дојде на 25-26-27, со тенденција на покачување, што никој не можеше да го предвиди“ – изјави Митрев.
За органското производство, конкретно за производството на масло, смета дека е надоградба на конвенционалното, со тоа што бенефит ќе имаат и самите земјоделци, затоа што суровината што ќе ја произведат ќе биде значително поскапа и маслото што ќе се произведе ќе биде нешто поскапо.
„Мислам дека тука има големи предизвици за сите нас и можеби и „Агрофила“ еден ден да се трансформира и од конвенционално да произведува органско масло, како што и прилега ладно цедените масла да бидат органски масла.
Затоа ние би се вклучиле во тој проект затоа што тоа на почетокот нема да бидат многу големи количини, да дадеме еден придонес да почне оваа работа, да видат земјоделците дека може и во наши услови да се договараат, да ги знаат сите калкулации уште во самиот старт, на почетокот на годината, со помош на Министерството за земјоделство преку различни начини на субвенционирање и мислам дека може да се направи голема работа, пред сѐ за земјоделците да не бидат оставени на неизвесност, да произведуваат со точно одредени цени, кои ќе ги знаат претходно и кои можат да бидат само повисоки, а не можат да бидат пониски. Мислам дека тоа е перспективата – заклучува Митрев.
