Европа е луда по растението женшен, кое успева и во Србија, а кое традиционално се користи во кинеската медицина. Сепак, ова растение е попознато по својата висока цена, која достигнува неколку илјади евра за килограм.
Растението женшен, познато и како панакс или „корен на животот“, потекнува од Кореја и Кина. Расте и диво на поголеми надморски височини. Со оглед на неговите лековити својства, дивиот женшен речиси исчезна поради прекумерна експлоатација.
Женшенот е познат по својот месест корен кој наликува на човечка фигура, а бидејќи му е потребно долго време за да расте и да биде подготвен за берба, како и поради неговите лековити својства, е исклучително скап.
Исто така, женшенот станал познат низ цела Европа како моќен афродизијак, особено за мажите.
Големи пари
Цената на ова растение може да варира од неколку стотици до неколку илјади евра за килограм.
Оние кои ќе одлучат да го садат мора да бидат свесни дека ова растение претпочита длабока сенка и преферира 70-80 проценти сенка. Идеално е да се сади во пошумени области каде што растат бука, јавор, орев и даб, а најдобро е да се сади на северната или источната страна, каде што почвата е поладна.
Како да се одгледува ова растение?
Покрај сенката, растението сака влага, богата иловица, добар хумус и добро дренирана почва. Семето од женшен може да се купи преку странски веб-страници и треба да се сади на есен или зима (декември до март), кога почвата е влажна. Идеално време за садење е по дожд или снег. Се сади на длабочина од 1,5 см, со растојание од 40 до 45 см помеѓу растенијата, а по садењето, семето мора да се покрие со земја, да се наводнува и да се покрие со лисја.
Семето ‘рти следната година, а растенијата постари од една година почнуваат да цветаат и да произведуваат црвени бобинки, од кои може да се собере семето. Одгледувањето бара трпение. Имено, за коренот целосно да порасне, потребни се најмалку 5 години, а најчесто 7 до 10 години.
За среќа, во овој период не треба да правите речиси ништо (ако сте ги засадиле растенијата во шума), или многу малку (ако сте ги засадиле во градина). Периодично проверувајте за проблеми со штетници или габи и отстранувајте ги високитте плевели. Ако растенијата се одгледуваат во градина, тие треба да се залеваат или наводнуваат во текот на топлите денови.
Женшенот може да се одгледува и во вазни, но важно е да имаат добар дренажен слој и да не се ставаат на директна сончева светлина. Глинените вазни не се препорачуваат, бидејќи апсорбираат влага и почвата се суши побрзо.
