На 12-та сесија на Работна група 1 – Земјоделство и рурален развој (Поглавје 11) на Националната конвенција за Европската Унија во Република Северна Македонија (НКЕУ-МК) на тема: “Меѓу предизвици и можности: Земјоделската политика на Северна Македонија на патот кон пристапувањето во ЕУ” која се одржа во Скопје, учесник беше и познатиот експерт од Словенија, проф д-р Емил Ерјавец кој повеќе од 20 години ја следи состојбата во македонскиот аграр.
Како добар познавач на состојбите во земјоделството во Европа и Македонија, Ерјавец со нескриено разочарување од годините што поминаа, а ние сеуште сме на иста позиција, порача дека нема откажување, процесот мора да продолжи и да финишира со успешни преговори.
„Кога се работи за преговарачкиот тим, ви требаат квалитетни луѓе, професионалци, луѓе кои ќе знаат да разговараат со Брисел. Интеграција е потребна, прво 30 луѓе од врвот на Владата, а потоа мора да се вклучат паметни луѓе, без разлика дали или со каква „боја“ се обоени. И да не се менуваат луѓето кои знаат да преговараат, на кои се научиле во Брисел, мора да има континуитет. Вас ви треба агроелита, најдобрите во оваа област, ако сакате да бидете успешни во овој процес. – рече Ерјавец.
Според него, кај нас има големи професионалци кои можат да го изодат овој пат со успешни преговори. Потребна е поголема интерсекторска соработка, имплементација на Зелената агенда, распределување на соодветни ресурси за програмите и мерките за животна средина и да се продолжат инвестициите во структурните реформи.
– Европа на 25 години менува нова стратегија и сега според најавите се свртува се повеќе кон Биодиверзитетот, зачувување на природата и средината, органско производство, а активистите стануваат се погласни и директни во барањата. Ова не оди во прилог на земјоделскиот сектор затоа што и владите на поголемите земји, тие што одлучуваат во ЕУ ги прифаќаат овие препораки и се повеќе средства се одвојуваат за тие проекти или активности. Затоа е многу важен тимот и луѓе кои ќе знаат да разговараат во Брисел, да се борат за тоа што е важно за вас и земјоделскиот сектор. – изјави Ерјавец.
