Европскиот парламент и Советот на Европската Унија постигнаа договор за годишниот буџет за 2027 година, кој предвидува 199,7 милијарди евра обврски за финансирање и 211,5 милијарди евра реални исплати. Ова е последниот годишен буџет во рамките на седумгодишната финансиска рамка за периодот 2021–2027 година. Европската Унија ќе располага со буџет од речиси 200 милијарди евра во 2027 година, откако преговарачите на Европскиот парламент и земјите членки постигнаа договор за распределбата на средствата за следната година, информира Слободен печат.
Со договорот се предвидени 199,7 милијарди евра за преземање финансиски обврски и 211,5 милијарди евра за исплати. Разликата произлегува од тоа што обврските се однесуваат на средствата што ЕУ може да ги договори за финансирање на проекти и програми, додека исплатите ги опфаќаат парите што реално ќе бидат исплатени во текот на годината за обврски од тековниот и претходните периоди. Буџетот за 2027 година е последниот во актуелната Повеќегодишна финансиска рамка на ЕУ за периодот 2021–2027 година, чија вкупна вредност е околу 1,1 трилион евра
Според договорот, средствата ќе бидат насочени кон клучните европски приоритети, меѓу кои економскиот развој, земјоделството, одбраната, безбедноста, управувањето со миграцијата, истражувањето и иновациите, како и поддршката за Украина.
Каде ќе се распределат парите?
Најголем дел од буџетот ќе биде наменет за кохезија, отпорност и европски вредности, за што се предвидени околу 75,8 милијарди евра. За природни ресурси и животна средина се издвоени 57,1 милијарди евра, во кои влегува и финансирањето на земјоделството и директните плаќања. За единствениот пазар, иновациите и дигитализацијата се предвидени околу 22 милијарди евра, додека за соседството и меѓународната соработка се планирани 15,5 милијарди евра.
Постигнатиот договор сега треба формално да го одобрат Советот на Европската Унија и Европскиот парламент. За тоа имаат рок од 14 дена, а гласањето во Европскиот парламент е планирано за 24 ноември.
Со усвојувањето на буџетот за 2027 година, ЕУ ќе ја заокружи последната година од актуелната седумгодишна финансиска рамка, пред почетокот на новиот буџетски период 2028–2034 година.
Извор – Слободен печат
