Почитувани!
Овој месец прославуваме 5 години од почнувањето со работа на специјализираната платформа за информации од областа на земјоделството и руралниот развој – АГРОТИМ.
Имам чест да Ви ја претставам новата подобрена верзија на АГРОТИМ.мк во која покрај стандардните проекти и активности имаме и нова иницијатива – АгротимПРО.
Се работи за нов проект на Агротим и водечките компании од агрокомплексот со кои заеднички ќе се обидеме да им помогнеме на земјоделците со едукација, организирање на Договорно производство, поддршка преку теренски, директни средби и други активности за приближување на заедничката земјоделска политика на ЕУ на нашите земјоделски производители.
Агрокомплексот мора да добие поголема видливост и гласност. Имаме сериозни земјоделци, професионалци, агробизнисмени кои инвестираат, компании кои вработуваат, го зголемуваат домашното производство на храна, стопанственици кои го заслужуваат статусот на општествено одговорни личности и треба да бидат препознаени во државата.
Пет години поминаа брзо, како и во секој бизнис, помалку или повеќе успешни, но во едно сме сигурни изградивме ДОВЕРБА со земјоделските производители, наши читатели и соработници. За нас лојалноста е најважна и тука компромис не правиме.
Пет години беа како земање залет за патот пред нас. Ве очекуваме со уште поголема соработка, ве повикуваме заеднички да го продолжиме патот до ЕУ и милионските пазари и фондови.
Со почит
Ленче Николовска
