Со цел овоштарството да биде успешен бизнис и да може да ги даде очекуваните резултати, треба да се превземат одредени активности за заштита на овошките од природни непогоди. Она што остава сериозни последици врз овоштарниците е секако градот, а во последните години тенденцијата на неповолни климатски услови е сè поизразена во нашиот регион.
Иако осигуритените компании, со услугите што ги нудат на земјоделците претставуваат одредена заштита за насадите, сепак тие можат да ги ублажат само финансиските загуби. Вистинските загуби се значително поголеми со тоа што овошките кои се погодени од град можат да имаат намлаен род и наредните години, а поради тоа може да дојде и до раскинување на деловните контакти со договорените купувачи и сл.
Поради ова последните години, како атрактивна и успешна заштита за овоштарниците се користи протвградна мрежа, со чија помош насадите со овошје адекватно се заштитени од климатските непогоди. Ова претставува гломазен систем за заштита кој небара дополнително одржување и со кој релативно лесно се ракува.
Кога овоштарникот ќе се покрие со противградна мрежа, тој е благо заштитен дури и од температурните варијации, во смисла дека во овоштарникот температурите ќе бидат пониски ако надворешните се екстремно високи и обратно, ќе бидат повисоки ако надворешните температури се екстремно ниски.
Конструкцијата на противградните мережи е составена од столбови, решеткасто распоредени низ целиот овоштарник, меѓусебно поврзани со систем од сајли, држачи, затегачи и др. прекриени со мрежи, чија основна функција е да формираат механичка заштита од град на целиот овоштарник.
Во зимскиот период мрежите се собрани и прицврстени со сајли поставени над секој ред. Во пролет мрежите се шират и меѓусебно се спојуваат со посебни спојки. Спојувањето се врши на растојание од неколку метри така да помеѓу спојките остануваат процепи за да може градот низ нив да се слева во средината на меѓуредниот простор.
Самите мрежи се направени од материјал произведен врз база на полиетилен. Во праксата најзастапени се црните мрежи но можат да се сретнат и сиви и бели мрежи. Покрај бојата тие се разликуваат и по хемискиот состав , односно според трајноста. Најотпорни се црните мрежи и за нив се вели дека нивниот век на траење е подолг од животниот век на овоштарникот.
За да може да се постави противградна мрежа неопходно е најпрво да се постават столбови кои можат да бидат бетонски или дрвени. Бетонските столбови се подолготрајни, но мора да бидат поставени на цврста подлога за да се избегне опасноста тие да почнат да тонат. Дрвените столбови се сосема адекватни за поставување на противградна мрежа , но мора да се води сметка да бидат од импрегнирано дрво за да бидат отпорни на влага.
Системот на противградни мрежи треба да биде проектиран посебно за секоја парцела, бидејќи мора да се земат во предвид сите карактеристики на теренот и на овошките. Пожелно е целата работа да им се препушти на стручњаците кои ќе можат да направат проценка на условите и според нив да го конструираат целиот систем.
Извор: Агро – еко Магазин
Напишете коментар