Во руралните области во Србија има сѐ помалку ливади и медоносни растенија, што доведува до зголемено истребување на пчелите во последниве години. Некои пчелари наоѓаат решение во урбаното пчеларство. Тие одржуваат кошници на покривите на зградите, во градските паркови, во дворовите.
На само 20 метри од автопатот, проф. Зоран Станимировиќ и неговите помошници во паркот на Факултетот за ветеринарна медицина во Белград се занимаваат со урбано пчеларство. Професорот вели дека нема разлика во квалитетот помеѓу руралниот и урбаниот мед.
„Квалитетот на урбаниот и руралниот мед е ист, нема разлика. Карактеристичен е за видовите чиј мед, чиј нектар пчелите најмногу го носат. Имаме мешавина од билки во пролет, подоцна глуварче, багрем, овошје. Се вели дека урбаното пчеларство дава поголеми приноси отколку пчеларството во рурални услови, каде што медот е, на пример, монофлорален, само багрем, маслодајна репка, сончоглед“, вели проф. д-р Зоран Станимировиќ од Факултетот за ветеринарна медицина во Белград.
Според него, ниту аерозагадувањето, ниту разните испарувања во градовите, не влијаат на својствата на медот.
„Пчелите прочистуваат сѐ што внесуваат во кошницата. Направив некои експерименти, покрај Рудник, ја следевме количината на честички и сите други честички кои не влијаеја на квалитетот на медот, иако во некои нектари може да се најдат остатоци од тешки метали, но пчелите тоа го филтрираат и го оставаат медот здрав“, вели проф. д-р Зоран Станимировиќ.
Сѐ повеќе млади луѓе се интересираат за овој вид пчеларство, што за некои станува добар извор на приход. А што е потребно за да се започне со урбано пчеларство?
„Пропишана регулатива за урбано пчеларство во Србија уште не постои. Прво, државата мора да го стори тоа, но некои луѓе се обидуваат на своја рака, но треба да бидете многу внимателни, бидејќи играњето со пчели може да биде опасно, ако не се обезбедат сите мерки за заштита“, рече професорот Станимировиќ.
Овој вид пчеларство е хоби за луѓето, но и бегство од стрес. Важноста на пчеларството во градовите е голема поради зачувувањето на разновидноста на зеленилото.
Во видеото погледнете како функционира еден урбан пчеларник на облакодер и во двор во Њујорк.
Извор: rts.rs
