Соларните панели на земјоделски површини стануваат вообичаена појава низ цела Европа. Најновите вести доаѓаат од Франција, каде што тие ги штитат лозјата на лозарот Пјер Ескуди, откако оваа година дел од неговиот род бил уништен од мразот, а потоа и од високите температури.
Соларните панели ги изолираат лозите за време на студените периоди и ги штитат растенијата од силна сончева светлина за време на топлотните удари. Интересно е што плочите се ротираат така што на растенијата може да им се обезбеди светлина, особено во облачни денови.
Зголемувањето на глобалните температури со зголемената фреквенција на топлотни бранови, сушите и студените екстреми го менуваат вкусот на виното. Предизвикуваат порано зреење на грозјето, што резултира со зголемување на шеќерот во гроздовите.
Овој лозар, кој ги одгледува сортите марселан, гринич грис и шардоне, одлучил да користи ротирачки соларни панели. Тој вели дека на сите ќе им требаат слични решенија доколку сакаат да ги задржат локалните сорти на грозје.
„Ова може да стане нашата иднина. Сите ние ќе треба да направиме нешто затоа што поминуваме од средоземноморска кон полусушна клима“, предупреди тој. Додава дека пред околу 30 години се сметало дека 32° C е екстремна температура, но денес таа се искачува до 40° C.
Александар Картие, менаџер на компанијата „Sun’Agri“ од Лион, која ги развила овие соларни панели, вели дека е забележана помала содржина на шеќер во грозјето од оваа плантажа, поради намалувањето на изложеноста на сонце.
„Тоа го спречи прекумерната појава на алкохол за време на ферментацијата, а лозата исто така има многу лисја што се позелени во споредба со онаа што не беше во сенка“, објасни тој.
Напојување на домовите со енергија
Исто така, плочите помагаат да се изолира почвата кога температурите се под 2° C, со што се заштитуваат земјоделските култури и виновата лоза од доцниот мраз што ја опустоши цела Франција на почетокот на пролетта.
Од компанијата пораќуваат дека поставувањето на панелите има взаемна корист, бидејќи покрај заштитата на лозјето, тие обезбедуваат и енергија за околу 650 домови во таа област.
Оваа технологија ги обработува временските податоци и одредува кога ќе ги засенчи посевите, односно ќе ги ротира плочите и ќе овозможи навлегување на светлината во лозите. Компанијата планира да ги користи на околу 40 мали земјоделски површини од два до четири хектари во јужниот дел на земјата, по долината на Рона и на бреговите на Средоземното Море во текот на 2022 и 2023 година.
Извор: agroklub.rs
