Агенцијата за финансиска поддршка во земјоделството и руралниот развој, на сметките на 7.101 субјекти исплати 27.069 000 денари. Станува збор за исплата на 30 отсто повисока субвенција од основната за секој фармер кој во споредба со претходната година го зголемиле основното стадо со говеда, овци, кози, маторици, несилки, и пчелини семејства. Оваа мерка се исплаќа по прв пат и беше Владино ветување, се со цел поттикнување на одгледувачите на добиток за зголемување на сточниот фонд во Република Северна Македонија.
Зголемена субвенција ги следува сите фармери кои земале субвенција за :
директни плаќања за грла говеда
директни плаќања за обележани грла на овци
директни плаќања за грла кози
директни плаќања за женски приплодни грла на маторици
директни плаќања за презимени пчелини семејства
Сите фармери кои земале средства по овие мерки и за разлика од претходната година го зголемиле бројот на основното стадо, добиваат дополнителна субвенција од 30 % за секое грло за кое е зголемено стадото во споредба со претходната година.
На пример ако еден сточар во 2017 година имал 100 овци, а во 2018 година има 110 овци, значи го зголемил стадото за 10 овци.
За нив ќе добие плус 30% односно 300 денари. Или за 100 овци ќе добие по 1 000 денари по грло, а за тие 10 плус колку што го зголемил стадото, наместо по 1000 денари ќе добие по 1 300 денари по грло.
Исто така важно е да се напомене дека нема ограничување за колку грла ќе биде зголемувањето.
Преку оваа Мерка се овозможува поттикнување на развојот на домашното сточарство, преку зголемување на основните стада. Со зголемување на добиточниот фонд во државата се зголемува и базата за производство на месо, млеко и мед. Со зголемувањето на домашните производи од животинско потекло, се обезбедува поефтина суровина која е важен инпут во индустријата за преработка на месо, млеко и мед.
