Зајакнување на имунитетот, ослободување од иритација на грлото и од кашлицата, детоксикација на телото, се само некои од придобивките од медот и производите што може да се направат од него. Слаѓана Рајковиќ Крњаиќ од Србија, имала интересна идеја како дополнително да се збогатува медот и да се подобри неговата гастрономска вредност. Имено, пред четири години таа започна да произведува крем- мед на кој му додава лиофилизирано овошје. Така е создаден брендот “Bliss Honey”.
Според неа на почетокот тие произведувале крем- мед само за семејството и пријателите, сè додека не одбрале вкусови со кои ќе излезат на пазарот. Нивната прва презентација пред поширок круг на луѓе била на Новосадскиот ноќен базар. Токму на овој настан тие ја имале својата прва продажба, и како што вели таа исклучително е чувството кога ќе направите нешто и некој ќе го купи вашиот производ.
„Идејата за производство на крем – мед се појави на едно наше патување, каде за прв пат видовме крем мед. Бевме заинтересирани за овој производ затоа што имавме сопствен пчеларник и сакавме да се обидеме да пласираме такво нешто на нашиот пазар, каде во тоа време немаше сличен производ. Освен фактот дека самиот мед има добро познати вредности, решивме да го подигнеме на ниво на деликатес “, објаснува Слаѓана.
Она што го разликува крем- медот од „обичниот“ мед е неговата нежна текстура без големи кристали. Крем-медот е погуст од медот во течна состојба и е погоден за транспорт бидејќи не се истура, а квалитетот на медот останува непроменет.
„Крем-медот се произведува со процес на фина кристализација. Овој процес го забрзува процесот на кристализација на медот под контролирани услови, кој трае до седум дена. Основата на нашиот производ е цветен мед, полифлорал. Во нашето производство користиме мед од сопствен пчеларник, но купуваме и мед од локални пчелари. Нашиот пчеларник во моментов има 77 друштва и се наоѓа на падините на планините Врчац. Нашата фабрика за производство исто така се наоѓа таму “, објаснува таа.
Слаѓана Рајковиќ Крњаиќ посочува дека ги купуваат сите суровини од локалните производители, бидејќи на тој начин им се помага и на малите производители, кои со својот бизнис ги хранат своите семејства, како и семејствата на нивните работници
Кога станува збор за состојките што ги додаваат во медот, тоа се природни состојки како лиофилизирано овошје, ореви, билки и тартуфи. Слаѓана, која по професија е професор по англиски јазик и литература, истакнува дека овој мед има повеќекратна примена и може да се користи како додаток на овесна каша, како додаток во овошните салати, за маринирање на јадења од пилешко или мисирка и сл.
„Рецептите најчесто се создаваат со тоа што самите ги пробаме вкусовите, па ако ни се допаѓа, тогаш ги споделуваме со нашите потрошувачи. Сакаме да играме со вкусови и да комбинираме нешто што на прв поглед изгледа некомпатибилно. Инспирацијата е насекаде околу нас, ова се понекогаш секојдневни намирници кои сакаме да ги збогатуваме со интересни зачини. Посебен чин е дегустацијата на подготвени производи “, посочи таа.
Слаѓана со својот бизнис покажа колку се важни иновациите и храброста за да се има успешно производство и пласман на производите. Тие го издигнаа домашниот мед од пчеларниците на едно повисоко ниво со подобрување на неговиот вкус и со додавање на природни состојки што ги набавуваат од локалните производители.
Извор: Агромедиа
