Во Мангура над Нова Варош, мечка скршила автоматска хранилка која во шумата ја поставиле ловци и од неа ја изела пченката наменета за дивите свињи и за срните. Ја издале трагите од канџите и шепите во калта, а ловците велат дека не паметат слична кражба на оваа.
Автоматската хранилка неодамна ја поставиле ловците во рамки на своите редовни активности за прихрана на дивеч.
„Се искачила четири метри по буката за да ја симне на земја хранилката закачена на гранката. Потоа на хранилката ѝ го скршила моторот кој е на соларен погон, па од дупката истекла поголема количина пченка. Мечките во овој дел од ловиштето не доаѓаа од минатата зима, но ги има во околните шуми“, вели ловецот Александар-Ацо Лековић.
Како што се претпоставува, мечката во Мангура се спуштила од Муртеница, на десниот брег на Увце, каде што минатата есен и зима во потрага за храна влегла во планинските села и на жителите од амбарите им крадела пченка, а заклала и десеттина овци.
Ловците велат дека овие денови ќе ја поправат хранилката и повторно ќе ја наполнат со пченка, која за многу животни е вистинско уживање.
„Хранилката е всушност адаптирано пластично буре со опфат од 200 литри, кое се закачува на дрво. На нејзиното дно е инсталирано моторче на дигитално управување, кое во програмирано време од хранилката исфрла одредена количина пченка за да ги нахрани животните. Механизмот го покренува батерија која се полни преку соларна плоча“, објаснува Лековић.
Прихраната на дивечот е постојана работа на ловците. Се спроведува цела година, најчесто во текот на големите снегови кога на жителите на шумата тешко им е да дојдат до храна во природа. Во последните неколку години во нововарашкиот крај значително е зголемен бројот на дивеч, особено срни, па сега според некои проценки во Ловиштето „Увац“ со површина од околу 58.000 хектари има речиси 900 срни.
„Вкоренето е мислењето дека ловците само убиваат дивеч, што едноставно не е точно. Нашата мисија е најпрво да се грижиме за природата и жителите на шумата и тоа не само во текот на зимата“, вели Лековић.
