Преговарачите на Советот на ЕУ и Европскиот парламент постигнаа договор за новата регулатива за Системот за влез/излез (EES), електронски систем што ќе го замени досегашното ставање печати во пасошите. По формалното одобрување од двете законодавни институции, Европската комисија ќе донесе одлука за постепено воведување на системот, со транзициски период од шест месеци.
Што претставува EES?
EES е заеднички електронски систем на ЕУ кој ќе регистрира и складира податоци за датумот, времето и местото на влез и излез на граѓаните од трети земји кои ја преминуваат надворешната граница на ЕУ.
- Автоматски ќе го пресметува времетраењето на дозволениот престој.
- Ќе испраќа предупредувања до земјите-членки кога некој ја надминува дозволената граница од 90 дена во рок од 180 дена.
- Ќе се примени кај лица со обврска за краткорочна виза, како и кај ослободени од виза но не се државјани на ЕУ.
Биометриски податоци и дигитална регистрација
Во рамките на системот:
- Граничните службеници ќе фотографираат лица или ќе скенираат отпечатоци од прсти, особено при прв влез во ЕУ.
- Овие биометриски информации ќе се складираат дигитално, што ќе овозможи следење на престојот на секој патник со странски пасош.
- Системот ќе важи за влез во Шенген зоната.
Постепено воведување
Поради неподготвеност на дел од земјите, иницијалната имплементација на EES беше одложена. Сега се планира постепено воведување:
- Во првите два месеци земјите ќе може да го користат системот без биометриски податоци.
- По три месеци, најмалку 50% од граничните премини треба да користат биометрија.
- До крајот на преодниот период, сите премини треба да бидат вклучени.
- Во меѓувреме, печатите во пасошите ќе продолжат да се користат.
извор: racin.mk
