Проблемот со пласманот на земјоделските производи најлесно се надминува со поголем развој на договорното производство со што земјоделците имаат сигурен пласман а со тоа и сигурна заработка.
Ваква шанса нуди нашиот најголем преработувач на сончоглед, фабриката „Благој Ѓорев“ од Велес. Капацитетот за преработка е 40 000 тони, а со тоа можноста за склучување договори со производителите е голема и треба да се искористи. На тој начин ќе се намали и одливот на девизи од државата, што е важно за намалување на трговскиот дефицит но и за граѓаните кои ќе користат масло од домашна и проверена суровина.
Од оваа година, МЗШВ имајќи ја предвид ваквата ситуација, ги зголеми субвенциите на 400 евра од хектар за земјоделци кои ќе насеат до 20 ха, а услов беше да се произведе минимум 1500 килограми од хектар.
Искуството на земјоделците со договорното производство е одлично и мотив за зголемување на површините следната пролет.
„Задоволни сме со договорното производство, како планиравме така и излезе на крајот. Имавме висок принос, а сончогледот го предадовме во фабриката „Благој Ѓорев“. Јас сум посебно благодарен на соработката со фабриката бидејќи ми дадоа добра цена, а и исплатата е навреме. Ги охрабрувам и другите земјоделци за да немаат проблем со пласманот да насеат сончоглед. Високи се субвенциите и се исплати ова производство“- вели Митат Исмаиловски од Будаково.
Со оглед дека фабриката „Благој Ѓорев“ има доволно капацитет за преработка добро е и другите земјоделци да го слушнат искуството на земјоделците кои имаа склучено договор со фабриката од оваа година и да размислат дали да остават површини кои на пролет ќе ги насеат со сончоглед.
„Ние сме отворени за соработка со земјоделците, колку ќе насеат, толку ќе откупиме и платиме. Имаме капацитет за преработка и среќни сме доколку за производство на маслото користиме домашен сончоглед. Годинава откупивме над 6000 тони сончоглед по 17,50 денари за килограм, што е значително повеќе од лани кога откупивме 2800 тони домашен сончоглед. Ова беше благодарение на заедничката соработка со Владата која иницираше поголем развој на договорното производство и мотивирање на земјоделците со зголемени субвенции“- изјави Горан Лазов, генреален директор на „Благој Ѓорев“- Велес.
Според досегашните временски прилики и сушната есен, се очекува земјоделците да остават површини за пролетната сеидба и уште повеќе да се зголеми домашното производство на сончоглед од реколта 2020 година.
Агротим заедно со Асоцијацијата на производители на сончоглед и раководството на „Благој Ѓорев“ во период што следи максимално ќе се вклучи во кампања за враќање на сончогледот на македонските ниви.
Преку платформата Агротим ќе ве информираме за сите активности поврзани со договорното производство на сончоглед , набавка на квалитетно семе, склучувањето на договорите со „Благој Ѓорев“, ќе го следиме процесот на производство, ќе ви даваме совети за правилно извршување на агротехничките мерки, за да добиете повисоки приноси и подобар квалитет, а со тоа и повисока цена. Исто така ќе ве потсетиме на важноста од земјоделското осигурување, за што државата плаќа 60% од осигурителната полиса.
