Стјепан Думанчиќ од Чеминце во Барање е еден од производителите кои се обидуваат своите производи директно да им ги продадат на купувачите.
Овоштарникот со јаболка на Стјепан Думанчиќ е една од најпосетените барањски локации од почетокот на оваа недела. Само во понеделникот и вторникот, значи првите два дена од Стјепановата работно-продажна-туристичка акција, низ редовите на неговите јаболки од сортата „гала“ поминале повеќе од 200 луѓе во потрага по квалитетни јаболка по пристапни цени и работен престој во природа.
Идејата, секако, не е нова. Во Хрватска имаше акции во кои овоштарите ги отвораат вратите на своите имоти за граѓаните и им овозможуваат за популарни цени да наберат овошје колку им треба. Но, во ова време, кога секојдневно на пазарите и во продавниците сме сведоци на поскапување на овошјето и зеленчукот, ваквите акции добиваат дополнително на тежина. Нашиот домаќин за граѓаните и за себе смислил спојување на пријатното со корисното.
„Видовме објава дека може да се дојде и да се набере јаболка за три куни (25 денари) по килограм, што е и двапати поевтино отколку во продавниците, па одлучивме да ја искористиме оваа многу добра прилика. Беше супер, се запознавме и со други луѓе, беше забавно“, рекла Тихана Влајниќ од околното Билје и додала со насмевка: „Гледаме дека има и црвчиња, што значи дека не се многу третирани“.
Акцијата ја пофали и Данијела Петров од Осијек.
„Одлична акција, спојување на удобното со корисното, цената е фантастична, јаболките совршени, времето убаво, убаво поминато време“, коментира Данијела, која е задоволна како и Данијела Цвијовиќ, која во бербата ја понела и осумгодишната ќерка Леа за да види каде и како се берат јаболката, кои инаку ги купуваат во продавниците.
И семејството Секол од Осијек стигнало со подмладокот. Нивниот шестогодишен син Јуре пред доаѓање им рекол дека најмногу се радува на кашичката која мајка му Ивана ќе му ја направи од набраните јаболка, па со родителите направил план и самиот да им помогне во бербата.
„На годишен одмор сме, па добра ни се виде идејата да го доведеме синот да види како изгледа тоа. Инаку, Стипе го знам од порано, многу интересен лик е со својот пристап за обработка на земјата кое од самиот почеток е некако поинакво, имаше и добри маркетиншки трикови, брендирање… Тој е дигитален земјоделец, па и ова го истера преку Фејсбук, луѓето да дојдат да работат нешто што инаку не би отишле да го работат кај своите баби кога е семејна работна акција. Гледам на тоа суперпозитивно“, изјавил Иван Секол за потегот на Думановиќ.
„Тоа го направивме од потреба. Трговските синџири бараат крупни јаболка за многу ниска цена, а ние немаме крупни јаболка. Не само јас, туку општо во цела Европа поради климатските промени и покрај наводнувањето, ѓубрењето… не се успеа да се постигне да добиеме крупни јаболка. Некаде се помалку ситни, некаде повеќе ситни, но генерално секаде се поситни од она што го бараат трговските центри. Тоа ни е проблем и бев присилен да го пробам ова речиси од очај, бидејќи друга варијанта е сѐ да се испрати во индустрија за 50 липи по килограм (4 денари). На крај излезе супер“, вели Стјепен.
Купувачите добиваат подобри, но поевтини јаболка и искуство во берење
Од позиција на Стјепан Думанчиќ со ваквиот начин на продажба сите се во добивка.
„За купувачите кои обично купуваат на пазар или во продавниците, три куни се доста поволна цена. Освен тоа, го имаат и тоа искуство сами да наберат јаболки од дрво. Ова е „вин-вин“ ситуација во смисла дека мене ми е добро бидејќи имам три куни без трошоци, купувачите имаат суперповолни јаболка кои се на дрво, а не од Полска, и трето, цело искуство, е добро“, изјавил Думанчиќ.
„На вкупно три хектари имам уште и сорта „фуји“, која наскоро ќе биде за берба. Ако помине сѐ да пласирам на ваков начин, веќе нема да одам да продавам на море за со потешкотии да заработам 3-4 куни, туку ќе отворам овоштарник и ќе продавам вака “- порачува овој овоштар кој на имотот нуди и свои брендирани мармалади, ајвар, мелена пиперка и сирупи под името „Стипино“, како и куќа за одмор со базен, настрешница со скара за забава, мал рибник…
Извор: јutarnji.hr
