По објавување на информацијата дека со ангажман на Министерството за земјоделство во Струмичко се откупени 40 тони пролетна зелкa, до редакцијата на Агротим се обратија неколку земјоделци кои тврдат дека на терен ситуацијата е лоша и зелката се откупува по 5 денари за килограм.
-Не е точно дека зелката се откупува по 10 денари. На терен ни ја земаат по 5 денари за килограм што е многу ниска цена која не ги покрива ни основните трошоци за производство – велат земјоделци од струмичко.
Неодамна на прес конференција министерот Димковски за откупот на пролетната зелка изјави дека како ресорно министерство го следат од самиот почеток и дека се запознати со состојбата. Тој ги повика откупувачите да ја понудат повисоки цени на странските партнери.
-Состојбата околу пласманот на зелка ја следевме од самиот почеток и одржавме состанок на барање на трговците каде што се разговараше да се задржи цената. Но овде на површина излезе еден проблем кој со години се провлекува и во иднина мора да биде реорганизиран целиот овој откуп и ниската цена кон странските купувачи доведе до овој проблем. Порака до откупувачите уште утре на своите странски купувачи да им понудат повисока цена бидејќи цената на зелката на странските пазари не е намалена. А исто така ќе мора да се направат и одредени законски измени затоа што ваквата состојба не смее да продолжи – изјави Димковски.
Но и покрај ова, на терен продолжуваат проблемите на земјоделците со откупот и ниската цена на зелката која денеска, според изјавите на земјоделците од струмичките села се откупува по мизерни 5 денари за килограм.
Земјоделците очекуваат поддршка од институциите.
