Најпознатиот земјоделец на Агротим е Веселин Илов од Долни Балван со неговата изјава дека има пари во земјоделството. Ставот го објасни со големата површина која ја обработува, плодната почва и можноста за наводнување.
Неговата изјава за тоа дека има пари во земјоделството ако се работи професионално, стана вирална и најмногу коментирана. Од тоа дека не ја зборува вистината, до поддршка од други земјоделски производителите кои ја потврдија неговата „математика“.
Деновиве го најдовме на нивите меѓу селата Таринци и Нов Караорман, каде ја подготвуваше површината за есенска сеидба. Секогаш расположен за разговор на тема земјоделство, направи пауза од орањето за да ни ги каже плановите кои ги има за новата земјоделска сезона.
Разговорот со него беше околу есенската сеидба, како помина оваа година и дали уште стои на ставот дека ако се работи професионално, има пари во земјоделството. Тој не пропушти да каже дека за земјоделците е неопходна поддршката од државата и дека моментално има незадоволство кај сточарите поради доцнење на субвенциите но верува дека тоа брзо ќе се среди и ќе нема други проблеми.
