Производството на храна за кучиња и мачки, во Србија стана профитабилен бизнис последниве години. Само во 2020 година Србија извезе 39.118 тони од оваа храна, вредна 89,5 милиони евра. Во 2012 година вредноста на извозот била скоро десет пати помала, односно 7,1 милион, а количината изнесувала 8.280 тони.
Дека овој бизнис е во подем и е добар за вложување, неодамна напомена и тамошниот министерот за земјоделство Бранислав Недимовиќ. Како што рече тој, производството на храна за домашни миленици во четири фабрики во Србија, бележи значителен раст на извозот, пишува Новости.
„Во Србија се прават готови и полупреработени производи, но и отпад од кланица трета категорија, кој се обработува до некое ниво и така се извезува“, објаснува Ненад Будимировиќ, секретар на Здружението за сточарство и преработка на сточни производи во Земјоделската комора на Србија.
„Најмногу извезуваме во Русија, Полска, Италија, Грција, Чешка, Швајцарија, Франција, Израел, Босна и Херцеговина, Велика Британија и Албанија“, вели Будимировиќ.
Официјалните податоци покажуваат дека само минатата година биле увезени 39.520 тони храна за кучиња и мачки. Вредноста на увозот изнесувала 37,5 милиони евра.
Многу доходовен бизнис во Србија
„Најголема размена на овие производи имаме со земјите од ЕУ и тоа стана многу доходовен бизнис во Србија“- објаснува Будимировиќ и додава:
„Не се зборува многу за оваа работа, па и не се знае колку е исплатлива. Имаме четири фабрики за производство на храна за мачки и кучиња, но и фирма во Бачка Топола, која прави полупроизводи што се извезуваат и понатаму се обработуваат. Со оваа работа во Србија главно се занимаваат наши, домашни компании.“-вели тој.
Значајна вредност од извозот на храна за мачки и кучиња се бележи во 2018 година кога таа достигнала 48,5 милиони евра.
Србија минатата година имала извоз од 247.000 тони храна за животни. Освен онаа за кучиња и мачки, тука спаѓаат и други компоненти кои се прават и се вметнуваат во сточната храна. Вредноста на извозот минатата година била 167,6 милиони евра и е четири пати поголема во споредба со 2012 година.
„Во храната за животни спаѓаат разни смеси, минерално-витамински или растителни компоненти, сончогледова и соина сачма. Сето тоа се смеси кои пред исхрана на животните се мешаат со пченка, бидејќи таа не се става во нив. Оваа храна за животни ја извезуваме во Велика Британија, Северна Македонија, Кина, Албанија и Перу.“- објаснува Будимировиќ.
Извор: poljoprivreda.info
