Со дождливите есенски денови, лисјата од стеблата на оревите почнаа да паѓаат. Дали годинава во Србија ќе има повеќе лисја отколку ореви и како родиле оревите кога сушата ги намали приносите на сите земјоделски култури, одговорот го даде д-р Боривој Богдановиќ, доцент на Земјоделскиот факултет во Нови Сад. Тој вели дека оревот, како и претходните години, добро родил. Ќе го има дури и на плантажите на кои не им се посветува доволно внимание.
-Во овој момент, тешко е да се одреди приносот, бидејќи оревот е во фаза на пукање на лушпата, а производителите се на самиот почеток на собирање на плодовите. Сушниот период за време на вегетацијата влијаеше на оревот поради намалените услови за развој на болести и штетници, така што плодовите од оваа вегетација сигурно ќе бидат поздрави, а со тоа и приносите ќе бидат поголеми. Оревот како овошје издржува различни климатски услови и разни типови на почва. Домашната клима го фаворизира одгледувањето ореви, а најдобро се развива на неутрални и малку алкални подлоги – вели Богдановиќ.
Додава дека кај во Србија ореви се одгледуваат на 4.000 хектари, од кои 500 хектари се во Војводина.
-Според Богдановиќ, оревот е дефицитарен и на светскиот пазар. Причината е што до пред дваесетина години се размножуваше само со семиња, а таквите садници доцна почнуваат да плодоносат, не даваат плодови со посакуваниот квалитет и родот често страда од доцни пролетни мразови. Затоа производителите не сакаа да садат ореви, а постоечките дрвја ги сечеа поради скапото дрво.
Недостасува стручна литература
Во моментов, во Србија садниците од ореви се произведуваат масовно со калемење. Имаме квалитетни сорти и селекции кои даваат редовни приноси. Современите насади даваат 1.500 до 2.000 килограми јатки по хектар, што го прави одгледувањето ореви профитабилно, така што интересот на земјоделците за одгледување ореви расте, иако немаме многу стручна литература.
На тоа укажува и производителот Ненад Враниќ од околината на Врчац. Во отсуство на литература и експерти, упатствата ги добива од Турција, каде што е развиена индустријата со ореви. Враниќ има млад насад, стар четири години. Тој очекува за две години да го добие првиот род, а полн род за уште две или три години.
Се определил за ореви бидејќи плодот може да се чува долго време, што не е случај со другите плодови.
-Малини, јагоди, кајсии можат долго да стојат во фрижидери, а сушените ореви можат да чекаат клиенти за добра цена повеќе од една година. Во моментов, килограм ореви во лушпа на странскиот пазар чини 3,5 евра. Кај нас, килограм исчистени ореви чини најмалку 1.000 динари. Половинките од орев се исто така двојно поскапи, половина килограм е 1.200 динари – нагласува Враниќ.
Но, забележува дека одржувањето на насадите е скапо и дека треба финансиски да се издржи додека оревот не донесе полн род. А кога тоа ќе се случи, нагласува, не е тешко да се соберат плодовите бидејќи има машини што ги тресат дрвјата.
На полн род треба да се чека десет години
Боривој Богдановиќ вели дека се потребни 4.000 евра по хектар за да се подигне плантажа со орев.
-Оревот е долгогодишно растение и треба да почекате осум до десет години за неговиот род. За тоа време, насадите треба да се одржуваат за да бидат подготвени да донесат целосен принос, што вклучува агро и помотехнички мерки што годишно изнесуваат од 800 до 1.000 евра по хектар.
Кога станува збор за профитабилноста, тој забележува дека односот помеѓу инвестицијата и приносот е променлив:
-Тоа е условено од квалитетот на садниците, предпреработката, последователната обработка и прихранувањето на насадите, и затоа се смета дека одгледувањето ореви е добра, но, во исто време и ризична работа.
Извор: ekapija.com
