Во областа Драгачево, на падините на планината Јелица, во српското село Броќиќи, на 70 хектари ливади, овоштарници и шуми, козите пасат, а потоа го даваат најквалитетното млеко. Секој што сака може да изнајми коза и да ги има на располагање нејзините производи.
Несекојдневната акција на тимот зад стартапот Козорциум нуди можност да изнајмите коза, да ја чувате од далечина и да добивате редовно, во текот на сезоната, свежо млеко, деликатесни сирења, јогурт, кефир, сурутка.
Александра Џанчиќ за РТС вели дека до оваа идеја дошле пред се со намера производите да стигнат до крајните корисници во градовите.
„Како и од голема желба и верба дека селата во Србија имаат иднина и дека таа е токму таму, на чист воздух, на падините на планините и со звуците на стадата. Самата платформа е идеја на Ненад Маринковиќ, кој е и сопственик на земјоделска фарма, а воедно и чува кози во Драгачево“, додава Џанчиќ.
На овој начин, вели Џанчиќ, сакале да им помогнат и на малите домаќинства кои често немаат доволно ресурси правилно да се грижат за животните и да складираат млеко и преработки од млеко. Од друга страна, препознле дека голем број луѓе во градот сакаат да ги добијат тие квалитетни домашни производи.
Како што објаснува Ѓорѓе Дубовина, заинтересираните можат да се пријават преку веб-страницата на која ќе ја пополнат апликацијата, а подоцна ќе ги добијат сите детали.
„Ги покануваме луѓето да аплицираат, како и малите домаќинства кои сакаат да се приклучат на оваа платформа, за да им помогнеме да ги пласираат своите производи и да заработат нешто од тоа“, додава Дубовина.
Оние кои ќе изнајмат коза, добиваат производи за возврат. Во моментов во понуда се два пакети производи, во зависност од количината на млеко што сакаат да го добијат.
„Во поголемото пакување добивате 15 литри млеко и можете да изберете дали сакате да добиете француско козјо сирење, халуми, јогурт, млеко. На козата можете да и дадете име, да и направите ланче, а можете да ја посетите и на фармата. Во одреден момент ќе се организираат и работилници за правење сирење“, додава Александра Џинчиќ.
„Сопствениците“ на кози производите можат да ги добијат во периодот од април до октомври, а досега веќе се пријавиле над двесте лица кои сакаат да изнајмат коза.
Во моментов, на фармата има околу осумдесет кози, а во јануари од Франција ќе пристигнат нови стада алпски и сански кози.
Слични програми има во Италија и Скандинавија.
