Во атарот на битолското село Барешани, Диме Стефановски и Марјан Трајчевски на 6 декари имаат насад со круши.
Почетокот им е необичен, ја имале земјата, идејата за насад со круши и желба за работа. Недостигала само решетелноста да почнат да се занимаваат со земјоделско производство бидејќи и двајцата имаат други професии.
Тогаш разбрале за мерката „Млад земјоделец“ и неповратни 10 000 евра, одлична можност за реализирање на идејата.
-Кога слушнавме за мерката на Министерството за земјоделство со која може да се дојде до неповратни 10 000 евра за земјоделско производство, не се мислевме воопшто. Тогаш буквално немавме ни мотика но затоа идејата за насад со круши веќе ни беше разработена и јас конкурирав – вели Стефановски.
Во меѓувреме започнале со производството кое не е едноставно, но ако професионално со нешто се занимавате и особено со мерак тогаш резултатот е очекуван.
-Редовно ги извршуваме сите агротехнички мерки и употребуваме органски препарати, нови технологии со цел добивање повисоки и поквалитетни приноси, а кога е производот квалитетен нема проблем со пласманот. Според мене мора да се следат новитете во производството и да се прилагодуваме на климатските промени кои знаат да го ограничат производството – вели Стефановски и додава дека работата на насадот е нешто што го исполнува и релаксира и кога би можел да бира би се занимавал само со земјоделско производство.
Во делот на заштитата и прихраната на крушите користеле органски препарати од кои се многу задоволни.
-Преку фејсбук се информирале за нашата фирма „Биоаграр“ и така стапивме во контакт. Излеговме на терен, ја пратевме состојбата на насадот и дадовме препорака. Тоа беше минатата година кога започнавме со зимска заштита со „сулфур бакар калциум“ затоа што имаше проблем со медова вошка. Понатаму ја следевме состојбата во текот на вегетацијата и дававме препораки. Во неколку наврати употребивме „Панамин“ кој даде одлични резултати. Задоволни бевме од родот и квалитетот на крушите – вели Ангела Ѓеровска Ѓуровска од „Биоаграр“ .
Интересен е и начинот како ги продале крушите. Интернетот и фејбукот се новите промотори на земјоделството.
-Ги собравме крушите, ги сортиравме, наредивме во гајби и се пофаливме на фејсбук. За кратко време почнаа да не прашуваат која е цената и да ни нарачуваат. Едноставно кажано не можевме да ги задоволиме сите барања и крушите веднаш ги продадовме по добра цена – раскажува Стефановски.
Успешната сезона дополнително ги мотивира партнерите да подигнaт нов насад, да се прошират и да произведуваат квалитетни круши. Поднебјето одговара за ова производство, а за пласманот вели дека колку и да произведат ќе ги продадат без проблем, а крушата секогаш има добра цена.
Што треба за да може млад човек да конкурира за мерката млад земјоделец?
Почитуван, сите услови и критериуми се објавуваат со повикот од страна на Платежната агенција. Сега се очекува нов повик со зголемен фонд од 20 000 евра за мерката „Млад земјоделец“. Следете Агротим.мк ќе ги имате сите информации навреме, а ќе има можност и за директна помош околу апликацијата од страна на нашиот тим. Поздрав