Фармите во Европската унија минатата година произвеле околу 160,8 милиони тони сурово млеко, објави Евростат. Посочуваат дека ова претставува зголемување за 0,8 милиони тони во однос на претходната година и зголемување за 15,8 милиони тони во однос на 2013 година.
Голем процент од тоа количество е испорачано во млекарниците (149,3 милиони тони), па така се произведени 22 милиони тони млеко за пиење и 7,8 милиони тони кисело млечни производи (како јогурт).
„За производство на 10,6 милиони тони сирење, искористени се 58,2 милиони тони полномасно млеко и 17,4 милиони тони обезмастено млеко“, соопштија тие, додавајќи дека дополнителни 45,4 милиони тони полномасно млеко се искористени за производство на 2,3 милиони тони путер.
Германија предводи
Според нивните податоци, Германија била најголемиот производител на млеко за пиење во ЕУ со 19 отсто од вкупното производство. Следува Шпанија со 15 проценти и Франција со 13 проценти.
Германија била и водечки производител на кисели млечни производи (27), путер (20) и сирење (22 проценти). Следува Холандија (17 отсто од производството на кисело млечни производи), а по неа е Полска (10 отсто).
Франција била втор најголем производител и на путер и на сирење (18 отсто од вкупното производство на ЕУ за секој производ). Ирска е трета во производството на путер (13 проценти), додека Италија е трета во производството на сирење (13 проценти).
