Во земјоделското производство секоја сезона си носи своја работа. Искусните земјоделци и они кои живеат исклучиво од земјоделското производство се зафатени преку цела година, комбинирајќи ги производствата и агротехничките мерки.
Боне Спасовски од село Виничани, Општина Градско заедно со неговата сопруга Марина обработуваат 3 хектари лозје, 7 хектари овошни насади, од кои претежно кајсии, сливи и праски, 1,5 хектар житарки и имаат 10 пластеници со раноградинарска култура – пиперка.
За прв пат во 2009 година, добиле помош од програмата за рурален развој и купиле трактор, атомизер и друга механизација во вредост од 12.500 евра, потоа од 2016 година се корисници на средства од ИПАРД 2 програмата, па така во 2018 година од мерката Инвестиции во материјални средства на земјоделските стопанства, средствата ги искористиле за набавка на трактор Ландини, Мулчер Риниери и Електрична ножица за режење Риниери во вредност од 1.505.320 ден.
Во своите пластеници Боне прво сади ран компир, а потоа пиперка капија и така двапати ги искористува фолиите. Така и утрово минусните температури не го исплашија овој искусен земјоделец да влезе во пластеникот и да го посее пиперот.
Боне вели дека главно е задоволен од она што го работи. Дури и во изминатата кризна година поминале добро, бидејќи, како што вели Боне, клучот за успехот е добриот квалитет, а за квалитетните производи секогаш има купувачи, па и добра цена. Иако Боне има загарантиран откуп за неговата пиперка, тој вели дека договорното производство е доста примамливо и чекор за посигурна иднина за земјоделците, кои на тој начин ќе имаат загарантиран откуп за нивните производи и нема да се случува родот да остане непродаден.
Семејството Спасовски е доказ дека земјоделството е сериозен бизнис во кој треба да се инвестира и да се работи професионално доколку сакате да имате успех и да заработите.
