„На планетава може да се произведе доволно храна за сите, има и доволно земја за секого, но проблемот е како ја користиме таа земја и каква храна правиме“, рече Само Логин, основач и сопственик на компанијата Логин ЕКО, која во Војводина купи повеќе од 4.000 хектари земја и планира да се занимава со органско производство.
„Наша задача е здравата храна да биде достапна за секого. Таа денес често е привилегија, а мислам дека не треба да биде така“, истакна Логин за време на разговорот во рамки на ЦЕО Самитот.
Творците на познатата видео-игра Talking Tom, која стана популарна низ целиот свет, Словенците Иза и Само Логин ја продале компанијата Outfit 7 за една милијарда долари, а неодамна бизнис-магазинот Finance ги прогласи за најбогати луѓе во Словенија, кои заедно располагаат со имот во вредност од 7,1 милијарди евра, пишува Nova ekonomija.
Што планираат да прават во Војводина?
„Нашата цел е да произведуваме органска храна на одржлив начин по исти цени како и конвенционалната храна. Производството на органска храна по исти цени како комерцијалните звучи невозможно, но тоа е можно со намалување на трошоците. Нашата визија е да го промениме земјоделското производство во иднина, да произведуваме храна на еколошки одржлив начин“, вели Само Логин.
„Ние не се водиме само од профитот, нашата цел е да произведуваме здрава храна за сите луѓе. Наша цел е да го промениме и модернизираме земјоделството за десет или најдоцна за 15 години и да почнеме да го применуваме секаде во светот и да имаме шанса да опстанеме како човештво“, рече тој.
