Органското производство во Македонија има потенцијал да стане клучен двигател на руралниот развој. Големата побарувачка за македонски органски производи на швајцарскиот пазар, бара од компаниите да зголемат количини и да обезбедат соодветен квалитет. За да го постигнат тоа, тие инвестираат во нови технологии, ЕУ-сертификација и модернизација на производството. Чекори што носат нови приноси и овозможуваат зголемување на капацитетите.
Во ова видео компанијата „Органико“ ја претставува својата приказна за тоа како македонското органско производство се позиционира и успешно се пласира на швајцарскиот пазар.
Се наоѓаме на полето на „Органико“, на кое моментално произведуваме ајварска пиперка, традиционална, куртовска капија за швајцарскиот пазар. Произведуваме ајвар, произведуваме модар патлиџан, исто така домашно семе и црвен домат, јабучар, исто така старо семе од традиционални сорти, вели Зоран Цветанов од „Органико“.
-Најважно за швајцарскиот пазар е органското производство. Бараат 100 проценти органско производство и ајварот го бараат во традиционална форма – печен на ќумбе, лупен со рака. Исто така со лажица ги полниме теглите. Ништо фабрички, сè традиционално како дома што го правиме. Веќе трета година работиме за нив и се исплаќа, им се допаѓа на нив и секоја година ги зголемуваат количините.
За швајцарскиот пазар произведуваме ајвар, лубеница, а оваа година малиџаното ќе биде нов производ во процесот на производство. Планираме да произведуваме и џем од кајсии.
Исто така избушивме бунар, бидејќи лани имавме големи проблеми со наводнувањето на пиперот. Имаше рестрикции, влечевме вода од приватни бунари за да направиме производство.
Оваа година инвестираа во бунар и пумпа и исто така ќе инвестираат во заштитна ограда со мрежа и со заштитни конструкции од страната и од горе за производството да биде заштитено од град и од невремиња.
Од производството лани бевме премногу задоволни. Оваа година ќе видиме, се надеваме дека ќе бидеме. Во ова производство е карактеристично тоа што користиме сè што ни дала природата. Џунџулињата, босилокот и блитвата покрај пиперот и покрај доматите ги садиме бидејќи ги напаѓаат некои инсекти. Кога се насадени џунџулињата, босилокот или блитвата, тие инсекти одат кај нив, бегаат од доматот. Ги пренасочуваме за да не ни ги напаѓаат доматите.
Проблемите со плевели ги решаваме рачно со копање бидејќи не прскаме против трева. За прихрана користиме ѓубриво од кокошки, а за прскање за прихрана користиме дозволени препарати како на пример хумусна киселина, морски алги за прихрана – средства што се дозволени во органското производство, вели Зоран Цветанов од „Органико“ – Мустафино.
