Познато е дека кикириките сакаат топла клима, а најголеми производители во светот се Кина, Индија, Нигерија и САД. Сепак, тоа не значи дека не може да растат во Хрватска, а една таква плантажа семејство Сучиќ од Врбања во Источна Хрватска.
Хрвоје потекнува од земјоделско семејство, а Ивана од семејство на пчелари. Така тие секогаш имале на располагање помали и поголеми парчиња земја, како и поддршка да направат нешто во земјоделскиот сектор. Тие барале нешто ново, кое малку или никој не го одгледува затоа што верувале дека тука има повеќе простор за малите земјоделци.
„Кикиритките беа идеја на Хрвоје и еден ден дојде со вреќа во која имаше семки од кикирики, точно 250 семки. Првата 2020 година ги засадивме во мал дел од градината. Знаевме многу малку за сеење кикиритки, нешто што можеше да се најде на интернет. Не ни знаевме како изгледа откако ќе никне, па беше проблем да се копа првиот пат, бидејќи не знаевме што копаме со мотиката. Скоро сè што посеавме никна“, вели Ивана.
Првата година поминала изненадувачки добро и целиот род го оставиле за семе за следната сезона. Следната, 2021 година, веќе била малку посериозна. Бидејќи виделе дека кикириките како растение напредуваат на нивните простори, решиле да отворат семејна фарма. Таа година посеале нешто повеќе од 2.000 квадратни метри, имале приближно 10.000 семиња.
„Околината беше малку скептична на почетокот, особено првата година. Не нѐ сфатија баш сериозно. Како што објавувавме сè на социјалните мрежи, втората година од производството веќе беше подобро дочекана. Редовно го објавувавме процесот, од сеидбата, копањето, како никнуваат и се развиваат. Реакциите на локалното население и на пријателите беа позитивни“, велат тие.
Решиле да произведуваат без пестициди, па имало многу рачна работа. За инсектите користеле природни препарати, односно мешавина од млеко и сода бикарбона и на тој начин го заштитувале растението од штетници. Таа година од голема помош им бил нивниот десетгодишен син Матијас, нивните семејства и пријателите. Тие им помогнале да копаат и да вадат кикирики бидејќи во тоа време им биле потребни што повеќе раце.
„Во една од тие работни акции разработивме план како семејство. Решивме да одиме на финалниот производ, па ни требаше бренд. Излезе името CROkiki, како идеално за хрватски домашни кикирики“
Откако бил успешно одгледан на нивата кикириките биле пренесени во дворот. Семејството се нашло пред огромна количина на кикиритки што требало да се кинат откако ќе се исушат ден-два на дршката. Се обиделе на еден начин – бавно, на друг – пак бавно. Тогаш Ивана се сетила на видео од Индија или Кина со свртен велосипед и не ѝ требало многу време за да го преврти и нејзиниот.
Едно лице ги вртело педалите, друго вметнувало стебленца во тркалата, па мешунките летале насекаде околу нив и паѓале на најлонот. Таткото на Ивана за два дена направил моторизирана верзија, па сè тргнало побрзо.
Во меѓувреме купиле дехидратор за да ги исушат исчистените кикирики и да можат да ги складираат. Решиле да понудат кикиритки на пазарот како финален производ бидејќи никаде не виделе локални, хрватски кикирики. За проба направиле несолени, солени и две верзии на пикантни, поблаги и многу зачинети.
Рецептот бил на Хрвоје, а кикириките се пржеле на суво, без додавање масло. Тие споделиле малку за проба со пријателите и семејството, за почеток.
„Но, тоа некако нагло се рашири и за месец и половина останавме без сѐ што произведовме. Повратните информации беа позитивни, се препозна дека производот е домашен и квалитетен. Се обидовме да произведуваме и путер од кикирики, и тоа во мали количини, успеавме, но за количината што може да им се понуди на купувачите, ни треба уште мелница за путер. Тоа е нешто што се надеваме дека ќе го добиеме следната сезона“, велат Ивана и Хрвоје.
Во путерот ставиле само мала количина мед, домашен и квалитетен, бидејќи планот им бил целото производство да го засноваат на домашни производи. Тие купуваат и пикантни зачини од локална семејна фарма која е специјализирана за нивно производство.
За наредната сезона решиле да засеат уште поголема површина кикиритки, а се пријавиле на разни тендери за полесно да дојдат до потребната механизација и со тоа да го олеснат производството. На нивната фејсбук-страница CROkiki можете да го следите процесот на производство на кикирики, а таму ќе почнат да ги нудат и своите производи.
„Нашите амбиции се големи, а чувството е добро, па искрено се надеваме дека сѐ останато ќе биде средено за да одиме според планот“, заклучуваат тие.
Извор: index.hr
