Европската Унија започна процес кој ќе овозвожи вината на кои на вештачки начин им е намалена содржината на алкохол, да стекнат право да се нарекуваат вино. Во новата категорија „деалкохолизирани вина“ ќе се најдат и пијалаци со помалку од 0,5 проценти алкохол.
Во рамки на реформите на Заедничката земјоделска политика на ЕУ која ќе стапи на сила на 1 јануари 2023 година, производителите ширум Европа ќе можат да произведуваат вина со помалку од 8,5 проценти алкохол.
Оваа најава веќе предизвика револт во некои земји, додека Италијаните се најгласни во отфрлање на можностите деалкохолизираните вина, како што е името на новата категорија, на пазарот да се изедначат со вината направени по традиционален метод и без намалување на уделот на алкохол.
Советникот на Европската федерација за вина со географско потекло, Даниела Ида Зандона, вели дека ќе биде овозможено со вино да се нарекуваат и пијалаци со минимален процент на алкохол.
Трпезните вина ќе смеат да имаат и помалку од 0,5% алкохол, додека вината со индикација на географското потекло во оваа категорија ќе може да имаат помеѓу 0,5 и 8,5% алкохол, прецизира таа.
Зандона објаснила дека оваа одлука не е обврзувачка, а секој поединечен вински регион сам ќе одлучува дали ќе ја прифати оваа конкретна промена. Одлуката за воведување на новата категорија е донесена поради сè поголемата побарувачка за иновативни производи од грозје кои содржат помалку алкохол од денешниот минимум за вино, се наведува во предлогот за земјоделска реформа на ЕУ.
„Ќе биде интересно да се види кој вински регион прв ќе ги прифати овие правила, а кога ќе се случи тоа, мислам дека „ќе пукне браната“, бидејќи постои голема побарувачка за вакви вина“, вели специјалистот за вино, Кристин Паркинсон.
„Отстранувањето на алкохолот од виното и додавање на вода е најнов „трик“ на Брисел насочен кон винарите“, смета претседателот на Колдирети, Eторе Прандини и додава дека винарите се веќе погодени со предлогот на шишињата вино да се стават предупредувања за штетноста на алкохолот.
Ова здружение наведува дека дозволата за нискоалкохолни пијалаци да се нарекуваат вино ќе означи сквернавење на древните винарски пракси. Во прашање е озаконета измама на купувачите кои наместо вино ќе купуваат вода, оценува Прандини и додава дека постои голем ризик да биде загрозен идентитетот на вината на Италија и цела Европа.
Предлогот да се озакони додавањето на вода во виното е само последна од низата измами на ЕУ која во земјите на Северна Европа веќе дозволила додавање шеќер заради подигнување на нивото на алкохол во виното, што е отсекогаш забрането во медитеранскиот регион, се наведува во соопштението на здружението Колдирети.
