Владата планира директна финансиска поддршка од околу осум денари за секој килограм предадена оризова арпа, а исплатата се очекува до крајот на годинава. Ова го најави премиерот Христијан Мицкоски, посочувајќи дека дел од средствата се веќе обезбедени, додека преостанатиот дел ќе биде предвиден со ребалансот на буџетот. Поддршката ќе се однесува на предадената оризова арпа во периодот од 1 септември 2025 до 15 септември 2026 година.
-Тоа се отприлика стотина милиони денари што ги обезбедува Владата, кои ќе бидат исплатени до крајот на оваа година, по завршувањето и усвојувањето на ребалансот во Собранието- изјави Мицкоски.
Според најавата, средствата треба да им помогнат на оризопроизводителите во текот на актуелната производствена сезона, а дел од финансиската поддршка ќе се обезбеди преку интервентниот фонд на Министерството за земјоделство, шумарство и водостопанство. Премиерот испрати порака и до компаниите што го откупуваат оризот, барајќи коректен однос кон земјоделците и предупредувајќи дека нема да се толерира евентуално шпекулативно однесување.
-Сакам да упатиме јасна порака и до откупувачите дека треба да се однесуваат фер, како што и Владата се однесува и како што граѓаните и оризопроизводителите се однесуваат фер кон нив, затоа што ова е двонасочна улица. Не би сакале да веруваме во шпекулативно однесување на поединци, затоа што тоа ќе биде ригорозно казнето- рече Мицкоски.
Жетвата на оризот е во тек во неколку општини од Источниот Регион. Според информациите во соопштението, годинава оризопроизводителите имале вода за наводнување на оризовите ниви. Најавената директна поддршка доаѓа во период кога земјоделците се соочуваат со трошоците за производство и потребата од соодветни услови за откуп на родот.
Исплатата на најавените средства се очекува по усвојувањето на ребалансот на буџетот во Собранието, а Владата најавува дека ќе ги следи и состојбите со откупот на оризот.
Извор – Слободен печат
