Европа има намера да осмисли производство на вино без алкохол или вино со помал процент на алкохол, со крајна цел да го подобри здравјето на луѓето, а тоа е токму главната тема деновиве во италијанските медиуми.
Весникот „Кориере дела сера“ пишува за „Бунтот во Италија“ за време на викендот, бидејќи идејата е виното да се разредува со вода, пренесува Вест Аустралиан.
Министерот за земјоделство, Стефано Патуанели, најавил дека Рим ќе се спротивстави на тоа, додека здружението на земјоделци Колдирети предупреди на „измама на потрошувачите“, пренесува италијанската новинска агенција Анса.
– Воведувањето на делумно и/или целосно намалување на процентот на алкохол во виното, како нова практика на производство на вино, претставува голем ризик и исклучително опасен преседан кој сериозно би го загрозил идентитетот на италијанските и европските вина – изјавил претседателот на Колдирети, Еторе Прандини во петокот, пренесуваат странските медиуми.
Продажбата на разредено вино како квалитетен производ досега беше забрането во Европа, потсетија и другите претставници на оваа индустрија. Иако некои љубители на вино сакаат да додаваат во виното обична или минерална вода, за да не се опијат премногу брзо, тоа треба да биде прашање на избор. На крајот на краиштата, вистинските познавачи пијат вино без никакви додатоци.
Исто така, на полиците во продавниците, купувачите можат да најдат вина што се декларираат како безалкохолни. Не е ни чудо што бунтот започнува од Италија, бидејќи таа земја е прва во светот според количината на произведено вино. Според последните податоци, годишниот приход од продажба на вино изнесувал околу 11 милијарди евра.
