Двајцата кумови од Бјелина (БиХ), Владимир Миличевиќ и Дарко Тешиќ, започнаа со производство на целосно природен сок од рози, кој наскоро ќе биде достапен и во кафулињата.
Владимир Миличевиќ вели дека нивната цел била, на сите кои сакаат сок од рози да им овозможат да го пијат во својот омилен локал.
– „Причината е многу едноставна. Сокот од рози е идеален за освежување во жешките летни денови, има одлична арома и вкус. Овој сок ги разгалува и душата и телото. Секој кој некогаш во животот пробал сок од рози, вели дека тоа е најдобар освежителен пијалок и ние сакавме тоа да им го овозможиме на сите“, вели Миличевиќ и додава дека во бизнисот влегол заедно со кумот, Дарко Тешиќ.
Тие го регистрирале земјоделското стопанство и со помош на семејството, еден пријател технолог и еден земјоделски инженер, ја набавиле кралицата на сите рози, а тоа е сортата “ROSA DAMASCENA”.
„Пред две години ја набавивме оваа сорта на рози и ја засадивме на семејното стопанство во Голема Обарска. Ништо не знаевме за одгледувањето на рози, но имавме голема помош од нашиот пријател Небојша Алексиќ, млад инженер по земјоделство. Со помош на неговите совети и под негова контрола ги применувавме сите агротехнички мерки“ раскажува Владимир.
Истакнува уште дека, нивните рози не ги третираат со конвенционални препарати, туку исклучиво со органски.
-„Инаку розата е многу отпорно растение, но потребно е да се заштити од лисните вошки како и од разни штетници кои можат да и наштетат. Доколку забележиме дека во голема мера се појавуваат одредени инсекти кои им штетат на розите, тогаш физички ги отстрануваме. Главно, има многу работа околу одржувањето на растенијата, се додека не дојде оној најубавиот и волшебен момент, кога тие почнуваат да цветаат. Тоа чувство не може да се опише со зборови, а секој кој дошол на имотот во периодот кога цветаат, се воодушевил од мирисот што тие го имаат, особено во утринските часови“.
Како што вели, рецептот за сокот е ист таков, како што го правеле и нивните баби и мајки, а тоа им била целта. Ги користат само ливчињата од розата, а се останато се фрла.
-„Розите мораат малку да отстојат за да ја испуштат својата арома, па потоа сокот се полни во шишенца, подготвени за дегустација. Не се додаваат никакви конзерванси, сокот е целосно природен. Особено децата, просто се воодушевени, а слично реагираат и сите останати кои досега имале можност да го пробаат“, објаснува Владимир.
Во план им е оваа година да го пласираат сокот на пазарот во Бјелина и евентуално во околните општини и градови.
-„Имаме доста планови, но нивната реализација во голема мера ќе зависи од тоа како ќе реагира пазарот. За крај морам да ги пофалам вработените во министерството за земјоделство, кои ни помогнаа во најкраток можен рок да ја добиеме потребната документација бидејќи тоа е најважно. Многумина мислат дека улогата на министерството е финансиски да помагаат, а всушност најважно е од стручни лица да добиете помош и совет како да надминете некој проблем.“, заклучува Владимир.
Извор: Агропортал.ба
