Во атарот на скопското село Света Петка каде и да погледнете во убавата природа, светкаат најлоните, се црвенеат редовите со јагоди, се слушаат трактори и гласови на земјоделци.
Ниви со прва година јагоди, други декари со јагоди во втора година и површини со јагоди во трета родна година, а тука некаде се и оние за расад.
Главниот проблем на сите земјоделци им е недостигот на вода, па се снаоѓаат со носење со цистерни што значително им го поскапува производството. Можност за наводнување има, во близина е реката Треска и нивното барање како земјоделци до Владата е токму решавање на тој проблем. Ветување добиле, ја очекуваат реализацијата.
Во меѓувреме, земјоделците од Света Петка не мируваат, по цел ден, секој ден се во плантажите и од корен на корен, се прихранува, заштитува, се плеви, се бере…се вршат сите агротехнички мерки.
Вака изгледаат 13 -те декари на искусниот земјоделецот Сали Велиоски кој 25 години одгледувајќи јагоди, процесот го довел до совршенство. За вложувањето во ова производство, од 2000 евра за еден декар, вели дека се враќа првата година. Петчлено семејство е ангажирано околу производството но главниот е тој и неговите активности од расад до берба.
За одгледувањето, вложувањата, заработката, пласманот и другите аспекти околу производството на јагоди, Салиоски зборува за Агротим.
