Во ЈГПБР „Меден Исток“, 30% од членовите се жени од руралните средини од Брегалничкиот Регион. Повеќето од нив со пчеларство започнале откако се вклучиле во обуките за пчелари-почетници организирани од Програмата за зачувување на природата – ПЗП.
Денес, тие дополнително го зголемиле бројот на пчелни семејства и размислуваат оваа дејност да им прерасне во сериозен извор на приходи, но сепак истовремено грижејќи се за природата и за биолошката разновидност.
Нада Јангеловска
„Пчеларството е дејност која треба да се работи со многу љубов и грижа кон пчелите“ е пораката на Нада Јангеловска од Македонска Каменица која што со пчеларство се занимава од 2015 година и е активен член на ЈГПБР „Меден Исток“ од самите почетоци.
Преку Програмата за зачувување на природата (ПЗП) таа успеа да ги надгради нејзините знаења и вештини за одгледување на пчели и постепено да ги зголемува пчелните семејства. Како жена од рурална средина која се занимава со пчеларство, Нада ги охрабрува и другите жени кои имаат желба да одгледуваат пчели, да не се двоумат во одлуката, бидејќи жената како и мажот може исто да ги одгледува пчелите, но и да остварува дополнителен приход.
Наташа Петрушева
Пчеларникот на Наташа Петрушева се наоѓа во прекрасната природна средина во речиси целосно отселеното с. Бунеш на 690 м.н.в во близината на Пробиштип. За прв пат со оваа дејност се сретнала на обуката за млади пчелари во Брегалничкиот регион, организирана од Програмата за зачувување на природата (ПЗП) и сега заедно со нејзиното семејство е посветена на проширување на пчеларникот и остварување на основни приходи од пчеларството.
Наташа порачува да ги сакаме и да се грижиме за пчелите, бидејќи тие се важни за зачувување на природата и општо за човештвото.
Мирјана Ивановска
Мирјана Ивановска од Македонска Каменица со пчеларство се занимава од 2002 година. Денес таа одгледува над 50 пчелни семејства и е активен член во ЈГПБР „Меден Исток“ уште од самото формирање. Во рамки на Програмата за зачувување на природата, нејзиниот пчеларник беше селектиран како еден од пчеларниците на кои беа тестирани и промовирани биотехничките методи: Затворање на матицата во кафез и Отстранување на легло. Според нејзе и двата методи се покажале како успешни, и затоа таа продолжува да ги користи овие методи со што нејзиниот мед е целосно безбеден, природен и квалитетен.
Со спроведување на активностите на ЈГПБР „Меден Исток“ за интегрирање и промоција на одржливиот начин на пчеларење, пчеларството станува сè поатрактивно за жените од руралните средини, што дополнително охрабрува и многу други да се занимаваат со пчеларство.
