Владимир Петрески од Охрид е нова генерација на агробизнисмени кој ја продолжува семејната традиција во земјоделското производство. За овоштарството и гардинарството вели дека е сериозна работа која не трпи импровизации и стихијност. Токму затоа предизвик е да се добие конкурентен производ кој нема проблем со пласманот.
„Мислам дека за да се постигне успех во земјоделствоот неопходна е макотрпна работа која е пропратена со доста љубов, сериозност и желба за нешто повеќе во овоштарството. Но не би можел сам во сето тоа без фамилијата од која сум наследил разни познавања кон земјоделството“ – вели Владимир кој додава дека заедно со семејството обработуваат 3хектари земја.
„Како Семејно земјоделско стопанство обработуваме 3 хектари од кои 2 хектари се под овошни насади и тоа со јаболка, круши, праски, сливи и 1 хектар се градинарски култури – домат, зелка, брокула и карфиол. Околу пласманот гледаме да немаме проблеми ради тоа што работиме со долгогодишни купувачи со кои имаме изградено меѓусебна доверба но се јавуваат и ситуаци во кои пазарот ја диктира потрошувачката. Тоа се неколку пиљари, два магацини на големо и сопствена тезга на градскиот пазар“- вели Владимир
Охрабрени од досегашното работење и традиција во производството, Владимир најавува за во иднина уште поголем ангажман и прилагодување на македонските производи на европските стандарди.
„ До сега искористивме еден повик од ИПАРД 2 програмата за модернизација на земјоделското стопанство во механизација и еден повик од програмата за рурален развој обновливи извори на енергија за модернизација за земјоделските стопанства односно фотонапонски систем за електрична енергија која ќе се користи за системите за наводнување. Само модерно производство кое ќе ги следи новите технологии може да гарантира успех- заклучува Владимир.
