Првите денови од изминатата недела имавме променливо облачно и топло време со повремени локални врнежи од дожд, но веќе во втората половина следеше пад на температурите. Минималните температури измерени на метеоролошките станици во изминатите два дена се спуштија под нулата во некои повисоки места, па така на 23 септември во Демир Хисар беа измерени -0.8°C, а на Суви Лаки (Берово) -0.4°C, додека уште постудено беше утрото на 24 септември, кога во Демир Хисар температурата се спушти до -2.3°C, во Делчево беа измерени -2.2°C, а во Берово -1.9°C.
Температурите под нулата во овој дел од септември претставуваат ран есенски мраз, кој може да предизвика сериозни штети кај културите кои сè уште се во активна вегетација, односно влијаат врз зеленчукот и овошјето кои сè уште не се прибрани. Кај топлољубивите едногодишни култури како што се пиперката, доматот и компирот, можна е појава на оштетувања на листовите и на самите плодови, а доколку грозјето од доцните сорти сè уште не е обрано, вака ниските температури можат да ја намалат содржината на шеќер во зрната, поради што се советува земјоделските производители итно да ги оберат сите дозреани плодови на отворено за да го спасат родот. Останатите култури се во период на предсеидбена подготовка, фаза на која треба да ѝ се посвети посебно внимание, при што површината на почвата треба длабоко да се обработи, а по ова да следи дополнителна површинска обработка со цел да се создаде растресит и иситнет слој во кој правилно ќе се посее семето. Паралелно со обработката, треба да се изведе и основното ѓубрење како клучна агротехничка мерка, бидејќи поголемиот дел од нашите почви се скудни со азот и фосфор, на што мора да се обрне посебно внимание, а со ваквата правилна и навремена обработка се создаваат оптимални услови за акумулирање на доволно влага во земјата и се стимулира активноста на корисните почвени микроорганизми.
Под влијание на циклонска активност времето утре ќе биде облачно и постудено со повремени врнежи од дожд кои ќе продолжат во текот на ноќта и во сабота претпладне. Локално врнежите ќе бидат пообилни (над 30 l/m²). Потоа следува период на променливо облачно и потопло време со сончеви периоди. Наместа ќе има зголемена облачност и услови за повремен дожд.
Се препорачува земјоделските производители да продолжат со активностите и грижата за нивните посеви.
Минималната температура ќе се движи во интервал од 3°C до 13°C, а максималната температура ќе се движи во интервал од 14°C до 27°C.
