Становите во Зелената кула – најголемата зграда во Грција, веќе се распродадени, по цена која достигнува неверојатни 26.000 евра за метар квадратен.
Зелената кула, големиот проект на Lamda Development, Marina Tower во областа Елиникон во Грција, иако беше претставен на почетокот на јули веќе најде купувачи за скоро сите 200 станови.
Како што пренесуваат грчките медиуми, грчките и странските инвеститори побрзале да си обезбедат стан во облакодерот на 45 ката.
Цените за метар квадратен се движат од 7.500 до 26.200 евра, а највисоките цени почнуваат од 30. кат па нагоре. Станува збор за естетски едноставна градба, во целосна хармонија со морето и особеностите на медитеранскиот пејзаж.
Целосната изградба на овој амбициозен проект се очекува да биде завршена за пет години. Станува збор за една од најголемите светски инвестиции, практично изградба на цел нов град во предградието на Атина, чија изградба е вредна 68 милијарди евра.
Marina Tower е само еден од проектите што треба да се изгради, заедно со огромен парк и бројни други станбени и комерцијални објекти, кои се промовирани како шанса за Атина да се позиционира како клучна туристичка дестинација со капацитети што може да им ги понуди на туристите цела година.
