Боге Јанковски, пчелар од село Тодоровци, општина Македонска Каменица 5 години се занимава со пчеларство. Има два пчеларника со околу 90 кошници, еден во село Тодоровци и еден во село Костин Дол, двата во општина Македонска Каменица. Едниот е на 500 метри надморска височина, а другиот на 900 метри.
„Нашата фамилија има традиција со одгледување на пчели уште од дедо ми, а сега се трудиме пчеларството да го работиме на еден посовремен начин. Произведуваме чист еколошки органски мед, поседувам сертификат за органско производство, нашиот мед е претежно ливадаски и планински мед, мешавина од полиморфни цветови, растенија. Имаме добиено неколку златни медали на натпревари за квалитетен мед. Освен производство на мед, кој сакаме да го брендираме како „Каменички мед“, произведуваме и прополис, саќе со мед, полен, матичен млеч“, вели Боге.
Јанковски ги користи субвенциите и помошта од ИПАРД програмата, досега учествувал на три повици и ги реализирал сите три и е задоволен од поддршката.
За во иднина планира осовременување и продолжување на производството, има набавено уште стотина кошници, планира производство на матици, на роеви, бидејќи поради климатските промени сѐ помалку има производство на мед во просек по пчелно семејство, па затоа мора да има алтернативни производи за да биде исплатливо пчеларството.
„Оваа година во нашиов крај поминавме релативно добро, за разлика од претходните три. Не можеме да направиме споредба со пред 10-20 години кога нашите претходници пчелари кажуваат дека имало и по 50-60 килограми мед, но за разлика од претходните три, оваа година просекот е некаде околу 10-15 килограми мед, така што е релативно добро.“
Боге вели дека нема проблем со пласманот на медот. Секој што купил еднаш, бара тегла повеќе.
„Цената на медот оваа година е 500 денари за килограм. Мислам дека цените не се многу зголемени зашто има тренд на зголемување на сите производи, вклучително и репроматеријалите што ние ги користиме во пчеларството, така што тоа повлекува едно со друго, па и цената мора да биде таа.“, вели тој.
Го прашавме Боге како може да се открие кој мед е природен.
„Природниот мед се гледа уште по самата боја, изгледот, вкусот. Препорачувам населението да си купува мед од познат пчелар за да избегне фалсификуван мед“, советува Боге.
„Сите што имаат слободно време, што ја сакаат природата и здравиот начин на исхрана и екологијата, да се занимаваат со пчеларство. Нашето поднебје изобилува со недопрена природа, и тука мислам дека е нашата предност“, вели Јанковски.
Во 2015 година во Македонска Каменица, Боге заедно со другите пчелари го основале здружението Екокаммед. Здружението има сопствен кабинет во кој има машина за производство на храна за пчели, како и апарати за контрола на квалитетот. Здружението секоја година врши едукација со домашни експерти, како и експерти од странство. Исто така се организираат посети на саеми за пчеларство во регионот, се набавува стручна литература со цел поголема едукација на одгледувачите на пчели, како и организирано засадување на медоносни дрвца секоја година.
Паркот на пчелите на кејот на реката Каменица во центарот на градот е исто така идеја на Здружението да создаде едно пријатно катче каде што освен што луѓето можат да уживаат, нема да ја заборават важноста на пчелите за екосистемот.
Pocituvani, radosen sum sto imav moznst da go zapoznam Boge a potoa i poblisku da sorabotuvame. Jas sum mlad pcelar kako Boge veli, so godini blizu do 80. Mnogu malku nauciv za blizu edna godina pcelarenje. No, ne se predavam, pcelite mi davat energija i samodoverba. Poglednete, kolku oni se mali a kolku se vredni, Koga bi nie logeto bile taka organizurani kako pcelite sigurno bi bile nesto sosema drugo no sto sega sme.
Zato fala mu na goge sto se resi da mi pomaga da ucam za pcelite. toa e nauka kako za gradeznistvo vo koe jas rabotev 56 godini a znam mnogu malku. Boge prodolzi so toj entuzijazam, ke stignes podadaleku od mnogu drugi