Лубеницата е едногодишно растение од фамилијата Cucurbitaceae. Расте од семе, во топла клима , а бидејќи содржи голема количина на вода, лубеницата претставува идеално летно овошје, а токму тогаш и зрее.
Се одгледува на отворно, во заштитен простор или комбинирано. Во заштитен простор, онаму каде што има медитеринска клима најмногу се исплаќа ранопролетното одгледување, веднаш после зимско- пролетната салата, додека во местата со континентална клима одгледувањето зависи од сончевите периоди.
Длабоко изорана почва и многу вода се клучни фактори за добар развој на лубениците
Почвата каде што ќе се садат лубеници мора да биде растресита, со добра структура, длабоко изорана уште од есента. Идеални почви се алувијалната и глинесто-песоклива. Ладната и набиена почва не е соодветна за одгледување на оваа култура. Коренот на лубеницата е долг понекогаш и повеќе од 2 метри, но во слојот од 40 до 50 сантиметри од површината е неговата најголема маса. За добар раст и родност, киселоста на почвата треба да има pH вредност од 5,0 – 5,5.
Минималната температура за ‘ртење на семето е околу 15 степени Целзиусови, а оптималната околу 30 степени Целзиусови. Ако во текот на одгледувањето на лубениците температурите паднат под 10 степени Целзиусови, растението ќе почне да пожолтува и многу тешко ќе се опорави дури и ако покасно температурите бидат поволни.
Што се днесува до снабдувањето со вода мора да ја има доволно, посебно во фазата на цветање и кога се формира плодот. За раст и развој на лубениците потребно е 300 -400 м3 вода на хектар, што пред се зависи од временските услови (суша или не).
Почвата на која се одгледуваат лубеници треба да има најмалку 2,5 % хумус
Непосредно пред сеидбата или пред садењето потребно е горниот слој од земјата да се иситни со помош на градинарска фреза. Растреситиот слој на почвата ја задржува влагата и му дава на растението потпора за добар развој на коренот и здрав раст.
Основната прихрана треба да биде со добро созреано шталско ѓубриво .
Секој кој се занимава со одгледување на оваа култура знае дека освен вода треба да се обезбеди и правилна прихрана.
Лубениците треба да се прихрануваат со шталско ѓубриво кое мора да биде добро созреано бидејќи во спротивно никулците на растението би можеле да изгорат.
Покрај шталското ѓубриво потребно е да се додаде и 400 -500 килограми минерално ѓубриво NPK во размер 1:2:1. Фосфорот е многу важен елемент за добар принос. Прихранувањето на лубениците се врши, 10 дена после пресадувањето па се додека не достигне 50 % од тежината на првите два плода.
Многу е важно да се прати развојот на растението па кога ќе почнат да се појавуваат ластари и гранки треба да се прихрани со KAN и тоа 150 – 170 килограми на хектар и тоа на два пати. Прихранувањето се врши пред наводнувањето, а треба да се внимава ѓубривото да не падне на листот.
Извор :Агроклуб
