Вечерва во Тетово, во организација на Земјоделските здруженија „ГРАДОТ НА ПЧЕЛИТЕ“ и „ПОЛОШКИ МЕД“, се одржа инфо сесија за мерката 113 – МЛАД ЗЕМЈОДЕЛЕЦ.
-Голем број земјоделци, пчелари и сточари имаат интерес за оваа мерка и беше потребна инфо сесијата за да се дознаат начините како да се исполнат критериумите за да се добие помошта од Министерството и Агенцијата. За оваа мерка максимална вредност на прифатливи трошоци е 20 000 евра и претставува висок износ, истакна Дритон Дикена од „Градот на пчелите“.
На средбата присуствуваа и Државниот секретар на МЗШВ, Нефрус Челику, Министерот без ресор, Хисен Џемаили и заменик директорот на Платежната агенција, Абдул Селам Селами.
-Мерките кои ги носи Владата се во интерес на поголем развој на земјоделското производство. Покрај редовните субвенции, деновиве актуелен е повикот за мерка 113 со која земјоделците имаат можност да аплицираат и искористат 20 000 евра државна поддршка. Како што веќе соопштија од МЗШВ, сите што ќе ги исполнат пропишаните услови и критериуми ќе бидат корисници на оваа мерка – истакна Селами.
Најмногу од присутните земјоделци се занимаваат со пчеларство и токму за инвестициите во пчеларството беа најголем дел од прашањата.
– Дали како прифатлива инвестиција може да биде набавка на пчелни семејства или на пчелни сандаци?
-Набавката на пчелни сандаци може да биде прифатлива инвестиција, но износот на пчелните сандаци не смее да изнесува повеќе од 20% од вкупната прифатлива инвестицијата за да може корисникот да добие 30 поени . Додека набавката на пчелни семејства не може да биде прифатлива инвестиција – одговори претставникот од АПРЗ.
Едно од прашањата беше и дали за објектите во кои ќе бидат сместени машините за доработка, чување, ладење на земјоделските производи ќе треба да се доставува имотен лист со кој ќе се докажува сопственост ?
На што се одговори дека нема потреба да се доставува имотен лист за објектите во кои ќе биде поставена опремата.
Замерките на земјоделците беа во делот на финансирањето, односно фактот дека прво треба да се обезбедат средствата, а потоа ќе се вратат од страна на државата.
-Овие пари се за да инвестирате во земјоделското производство, не мора сите 20 000, можете да аплицирате за 5000 евра, толку колку што ви се потребни за одредена инвестиција или колку што сте способни во моментов да инвестирате – изјави советникот Петре Петревски од АПРЗ.
Државниот секретар на МЗШВ, Нефрус Челику уште еднаш ја потенцираше важноста од ваквите средби кои се значајни за земјоделските производители.
-Големиот интерес за инфо сесијата покажа дека пчеларите се сериозни производители и дека оваа сточарска гранка бележи развој. Во тоа секако голем придонес имаат земјоделските здруженија кои им помагаат околу едукација и информации, а Министерството за земјоделство и натаму ќе ги слуша сугестиите на земјоделците во носењето на мерките кои се од значење за нивниот развој но и за вкупниот аграр – изјави Челику.
Повикот за мерката 113 е до 10 март, а Агротим ќе ги користи сите можности да ги информира земјоделците и едуцира со цел да се искористат овие средства кои се наменети за нив, младите до 40 години.
