Како и кај другите овошни видови, и за боровинките, најважно е добро да се подготви почвата за садење бидејќи нејзиниот коренов систем е еден од „најслабите“, продира до длабочина од само 40 сантиметри.
Затоа, потребно е почвата да биде иситнета толку што кога ќе се згазне, ногата да потонува во неа. Значи, по длабокото орање, потребно е почвата да се иситни доволно со фреза за да може лесно да се развие кореновиот систем во сите правци.
Откако ќе се иситни почвата, се обележуваат редовите. Во правец на редот се поставуваат струготини и супстрат. Супстратот е кисел и 600 килограми се доволни за 1.000 метри квадратни, а 10 кубни метри струготини. Најдобра е струготина од иглолисно дрво, додека дабовата струготина не треба да се користи.
Потоа се прават гредичките. Тоа се всушност подигнати редови. Од двете страни, земјата се натрупува со еднообразен плуг, кој потоа дополнително се ситни со фреза. На овој начин струготината и компостот ќе се измешаат со почвата рамномерно по целата должина и ширина на редовите.
Висината на издигнатите редови треба да биде од 30 до 40 сантиметри, а ширината од еден метар до еден метар и триесет.
На врвот на редот, по средината, се садат боровинките. Редовите мора да се подигнат, особено на рамна почва, бидејќи коренот на боровинките не смее да лежи во вода по обилни врнежи. Ако редовите се подигнат, водата се цеди од страна и нема застој на кореновиот систем.
Засечете го кореновиот систем
Со мотика на врвот се копа дупка длабока околу триесет сантиметри. На дното се става садницата, кој откако ќе се извади од саксијата се засекува на три до четири места со скалпел или нож од врвот до дното околу коренот на расадот.
Засекот не треба да биде долг повеќе од еден сантиметар за да не се оштетат подебелите коренски жили.
Со овој потег се кинат кореновите влакненца кои биле завиткани во садот, односно свртени навнатре. Со кинење со скалпел, тие по садењето ќе се движат рамномерно во сите правци, а не само кон средината на редот. Расадот се потопува во вода, се сади и се нагрнува. Почвата околу расадот треба да се натапка со раце.
Боровинките сакаат кисела почва. Тие можат да издржат рН до 3,5, но во пракса се покажало дека можат да се произведат дури и ако рН вредноста на почвата е малку над 5.
Извор: Agroklub
