Цените на минералните ѓубрива скокнаа поради кризата во Украина. За уреа, на светско ниво преку ноќ пораснаа повеќе од 200 долари по тон. Ова поскапување е придружено со наглиот раст на другите ѓубрива како што се калиумот и фосфорот.
Русија беше најголемиот светски извозник на азотни производи во 2021 година, но и на калиум и фосфор, пишува Агрархеуте. Поради помалата извозна понуда најпрво ќе бидат погодени земјоделските пазари од северната хемисфера. Пазарите веднаш реагираа на проблемите со снабдувањето со огромен скок на цените.
Прво погодени пазарите на северната хемисфера
Џош Линвил, директор на секторот за ѓубрива во американската истражувачка компанија StoneX, рече:
„По падот во последните неколку недели, сега гледаме дека глобалните цени на уреата преку ноќ скокнаа за над 200 долари по тон. Во најважниот американски трговски центар НОЛА уреата во четвртокот поскапе за 150 до 200 американски долари по тон во четвртокот. Скокна за една третина за помалку од 12 часа. Крајот на ваквиот развој не е на повидок“.
Сепак, Линвил вели дека промената во глобалната понуда и побарувачка не е резултат на нападите, туку првенствено се заснова на страв.
Алексис Максвел, аналитичар на Green Markets, во изјава за Блумберг рече: „Помалата извозна понуда најпрво ќе ги погоди земјоделските пазари во северната хемисфера, бидејќи сезонската потрошувачка достигнува врв во второто тромесечје“.
Конфликтот меѓу Русија и Украина ги зголемува стравувањата од глобалниот недостиг и ја зголемува загриженоста за зголемувањето на цените на другите минерални ѓубрива и храна.
Големиот американски производител Mosaic Co. предупреди на недостаток на калиум. Како резултат на стравувањата, растат трошоците за земјоделците кои ќе мора да ја ограничат употребата на ѓубрива поради високите цени и недостигот. Ова може да доведе до помали приноси и дополнителен раст на светските цени на храната.
Можен недостаток следната година
„Светските цени неодамна достигнаа врв и донекаде паднаа. Сега повторно нагло се зголемуваат“, вели аналитичарот Максвел. „Постои многу реална можност следната година дасе соочиме со недостиг, особено во претстојната земјоделска сезона во Северна Америка“.
Одделот за земјоделство на САД објави дека производителите „не смеат да ја користат оваа ситуација како изговор за да направат нешто што не е нужно оправдано со понудата и побарувачката“.
Белата куќа објави дека некои големи компании ја искористиле својата пазарна моќ за да ги зголемат цените за земјоделците повеќе од оправдано, пренесува agroklub.
