Јагодата е едно од најомилените овошја во многу градини, но за да обезбедат крупни, мирисни и квалитетни плодови во текот на сезоната, неопходна е правилна и навремена пролетна нега. Овој период е клучен за развојот на растението, бидејќи токму тогаш се создава основата за здрав насад, силен раст и висок принос.
Санитарно кастрење и расчистување на насадот
Со затоплување на почвата и почеток на вегетацијата, јагодите влегуваат во активна фаза на развој. Првиот чекор е внимателен преглед на секое растение, при што треба да се отстранат сите суви, оштетени и заболени листови, како и старите изданоци и розети кои не ја преживеале зимата.
Остатоците од растенијата не треба да се оставаат во насадот, бидејќи можат да бидат извор на болести и штетници, па затоа најдобро е да се отстранат или уништат. При кастрењето се препорачува користење остри ножици, наместо кинење со рака, со цел да не се оштети кореновиот систем.
По расчистувањето, важно е да се отстрани плевелот и внимателно да се обработи почвата помеѓу редовите. Бидејќи коренот на јагодата е плиток, обработката треба да биде површинска и внимателна.
Превентивна заштита од болести и штетници
Јагодите се чувствителни на бројни габични заболувања, како и на напади од инсекти и други штетници. Затоа, веднаш по пролетното чистење, се препорачува спроведување превентивна заштита со соодветни фунгициди и инсектициди, согласно препораките за конкретниот насад.
Во услови на повисоки температури и одржливо производство, може да се применуваат и биолошки препарати базирани на корисни микроорганизми. Правилната и навремена заштита значително го намалува ризикот од инфекции и овозможува поздрав развој на растенијата.
Третманите може успешно да се комбинираат со фолијарна прихрана и препарати со аминокиселини, со што дополнително се зајакнува имунитетот и отпорноста на растенијата.
Пролетно прихранување за силен раст
За да се обезбеди обилен и квалитетен род, јагодите мора да имаат доволно хранливи материи уште од почетокот на сезоната. Во пролетниот период се препорачува примена на комплексни минерални ѓубрива кои содржат азот, фосфор, калиум, микроелементи, хумусни материи и аминокиселини.
Ѓубривото рамномерно се распределува околу растенијата и лесно се внесува во почвата, со што се поттикнува побрз развој на листната маса, коренот и идните цветови. Дополнително, може да се користи и фолијарна прихрана за побрз ефект.
Во периоди со можни температурни стресови, се препорачува употреба на биостимулатори за подобрување на отпорноста.
Правилно наводнување
Наводнувањето е еден од најважните фактори за успешен развој на јагодите. Во пролет, особено при сончево време и побрзо сушење на почвата, недостатокот на вода може сериозно да влијае врз растот, фотосинтезата и формирањето на плодови.
Почвата треба да се одржува умерено влажна, без прекумерно задржување вода. Наводнувањето треба да се врши кога површинскиот слој ќе почне да се суши, а на потопли и изложени места може да биде потребно и почесто полевање уште од мај.
Редовен мониторинг на насадот
Во текот на целата пролет, насадите треба редовно да се контролираат. Следењето на здравствената состојба на растенијата, навременото отстранување на плевелот и брзата реакција при појава на болести или штетници се клучни за зачувување на приносот.
Превенцијата и континуираната грижа се секогаш поефикасни и поисплатливи од доцните интервенции.
Наш совет
За успешно производство на јагоди, пролетната нега не смее да се занемари. Редовното чистење, правилната прихрана, навремената заштита и контролираното наводнување се основа за здрав насад и висок принос. Следете ги состојбите во насадот, применувајте стручни препораки и инвестирајте во превенција – затоа што добро подготвената јагода во пролет, носи квалитетен и профитабилен род во сезона.
Извор – Советодавна
