Тим од подрачната единица на Министерството за земјоделство, шумарство и водостопанство во Прилеп, денеска беа на терен во селата Големо Коњари и Мало Коњари.
-Ги затекнавме земјоделците секој со својата работа но пријатно беа изненадени од нашето присуство и можноста да добијат картички со 30% поефтина нафта. За нив ова мерка на Владата има голема важност бидејќи најголемиот трошок во производството е токму нафтата – изјави за Агротим, Зоран Пачешкоски – раководител на ПЕ во Прилеп.
Пачешкоски апелира до сите земјоделци да дојдат во нивните канцеларии и да ги подигнат картичките „Зелена нафта“ и да ја искористат оваа поволност која им се нуди за конкурентно производство.
Откупот на тутунот е во тек, а од подрачната единица на МЗШВ велат дека тој се одвива непречено. Тутунопроизводителите го предаваат во откупните претпријатија со кои имаат склучено договор.
-Откупот се одвива нормално, со динамика предвидена како за почеток на секој откуп. Генерално земјоделците се задоволни од квалитетот на годинешната реколта и очекуваат повисока откупна цена. Субвенциите си остануваат како лани, по класи односно за прва класа 80 денари за килограм, втора класа е 70 денари и за трета и останатите класи субвенцијата е 60 денари за килограм тутун – вели Пачешкоски.
