Постапка за поднесување барање за субвенции: Земјоделецот Лазо Недевски за 10 минути поднесе барање и се запиша во регистарот

Како што веќе информиравме започнато е поднесувањето на барања за субвенции и тоа за производи предадени во преработувачката индустријa, предадено грозје и органско производство за 2019 година.

До 25 ти декември ќе трае поднесувањето на барања за предадено овошје и зеленчук во регистрирани преработувачки капацитети. Поднесувањето е веќе започнато.

Исто така до 25 ти декември ќе трае и поднесувањето на барањата за органско производство (мерки за преработка, трговија, стручна контрола и сертификација, лабораториски анализи). Поднесувањето исто така веќе е започнато.

Започна пријавувањето и за дополнителните 2 денари за грозјето и трае до 25 -ти декември. Потребна е потврда за предадено грозје.

Како оди цела постапка на поднесување барање ќе ви прикажеме преку примерот на земјоделецот Лазо Недевски, производител на органско гоџи бери.

Недевски според живеалиште на лична карта (а не според тоа каде се наоѓаат површините) припаѓа во Општина Карпош таму и поднесува барање за добивање на субвенции.

Првиот чекор е пополнување на техничко барање за органско производство и потоа заверка на барањето во архива.

Потоа операторот ги превзема документите и врши аплицирање и тоа за директни плаќања, за стручна контрола и сертификација за директни плаќања за трговија или извоз на свежи или преработени органски производи.

Недевски ги поднесе и потребните документи кои се бараат:

Договор со овластено тело за вршење на стручна контрола и сертификација.

Фотокопија од сертификат за извршена стручна контрола и

Финансов документ за продадени производи на домашен пазар.

Неговото доаѓање во Подрачната единица во Карпош го искористи и за да ги ажурира податоците во Единствениот регистер на земјоделски стопанства и СИЗИП за мерките по површини.

Ажурирањето на податоците се врши до 15 ти март 2020 година. Оние земјоделци кои нема да ги ажурираат податоците, за мерките по површина нема да можат да аплицираат за субвенции. Ажурирањето важи и за сите земјоделци кои аплицираат за мерките по површина.

Сета оваа активност на земјоделецот Лазо Недановски траеше 10 минути по што тој замина задоволен од ПЕ Карпош во Скопје.