Употребата на антибиотици во сточарството е тема за која сè почесто се расправа, а во посебен фокус е последнава година од кога владее пандемијата на ковид-19.
Кон крајот на минатата година, научниците предупредија дека отпорноста на лекови е поопасна од ковид-19. Тогаш Организацијата за храна и земјоделство на ООН (ФАО), објави дека драстичното зголемување на резистентноста на микроорганизмите би можело да резултира со нова пандемија, пренесува Агроклуб.
Покрај тоа, Светската здравствена организација (СЗО) ја вброи антимикробната резистенција (АМР) меѓу десетте глобални закани. Но, ова сознание, според експертот за здравје на животните, Едгар Гарсија Манзанила, од ирската организација за развој на храна, „Теагаск“, не е доволно во центарот на вниманието на јавноста.
„Тоа е слично како и со климатските промени – не се гледаат веднаш, па затоа е тешко да се поттикнат луѓето да реагираат“, изјави за Еурактив Манзанила, еден од координаторите на неодамнешниот извештај за намалување на употребата на антибиотици кај живината.
Планот на една од најважните стратегии на ЕУ, „Од фарма до вилушка“, е до 2030 година да се намали вкупната продажба на антимикробни производи во сточарството и аквакултурата за 50 проценти.
Манзанила тврди дека употребата на антибиотици во живинарскиот сектор е намалена до 90 проценти, што го прави референтна точка за другите. Но, тој исто така посочува дека колку повеќе се напредува, толку е потешко да се намалат количините.
Друг проблем е што ЕУ нема целосна и прецизна слика за степенот на употреба на овој вид средства на фармите. Податоците се собираат само врз основа на податоците за продажбата, за што Манзанила вели дека не е доволно конкретно.
Во написот се нагласува дека сите земји на ЕУ ќе мора да ја измерат употребата на антибиотици на ниво на видот до 2027 година, но Манзанила смета дека ќе биде доцна за да се постигне моменталната цел.
Нема време за чекање
Манзанила смета дека голема помош во обидот да се намали нивната употреба би била алатка која би го тестирала животното на самото место и би покажала дали му треба лек или не, но таа алатка да биде достапна и лесна за употреба.
Имено, кога ќе се појави првиот симптом на инфекција, за добитокот може да биде веќе доцна, а сточарите не можат да си дозволат таква „небрежност“.
„Болеста може да ги убие за еден или два дена, па ако се сомневате за некаков проблем, мора да преземете мерки за да го спасите животното. Тогаш нема време да се испраќаат примероци во лабораторијата“, рече Манзанила, заклучувајќи дека во борбата против намалување на користењето на лекови таквите алатки за тестирање ќе бидат сè повеќе потребни, но сè уште не е точно познато за каква помош во одгледувањето добиток станува збор.
