Производителите на ориз од Кочанско повторно ќе излезат на протести и со земјоделска механизација ќе го блокираат магистралниот пат Кочани – Штип, за да го изразат незадоволството од неисполнувањето на договорот за висината на откупните цени.
На денешната прес-конфренција истакнаа дека се чувствуваат изманипулирано затоа што жетвата на овогодишната реколта е почната, а откуп нема, ниту пак откупните цени што се нудат се на очекуваното ниво.
-Блокадата на магистралниот пат ќе биде во вторник во Облешево, со почеток од 9:30 часот. Единствено наше барање е да се исполни тоа што беше договорено со Владата, односно да не добиеме под 25 денари за килограм арпа. Три-четири месеци алармираме дека ситуацијата со оризопроизводството е страшно лоша, но се нема слух, се одолговлекува да поминат изборите, а ние ништо нема да добиеме, истакна Здравко Арсов, земјоделец од Облешево.
Земјоделците се заканија дека протестот и блокадата нема да траат неколку часа, како претходно, туку сè додека не им се исполни барањето. Нагласија дека можни се привремени решенија со итна исплата на основните субвенции до крајот на октомври, а во меѓувреме да се преговара за цените и начинот на откуп.
-Имаше предлози за субвенции од три до пет денари за килограм предадена арпа, тоа до сега не е реализирано, а времето ќе покаже дали сме излажани, во моментот немаме решение. На пазар и во продавница оризот го продаваат по 70-80 денари, а нам ни плаќаат по 35 денари за килограм бел ориз. Производителите немаат никаква заработувачка, а трговците се со стопроцентна заработувачка, ова не води никаде, истакна Стојче Ташовски, земјоделец од Облешево.
Дополнителен проблем ќе биде и влажноста на зрното, особено поради интензивните врнежи, поради што земјоделците ќе имаат финансиска загуба при откупот за процентот на влага што ќе им биде одбиен.
Според сегашните цени на репорматеријалите, производната цена изнесува 23 денари за килограм арпа, што е повисока од откупната, поради што оризопроизводителите апелираа до надлежните да најдат решение што ќе им овозможи пристоен живот.
МИА
