Децата се чести учесници во несреќите со трагични последици на фармите. Најчесто загинуваат со газење на тркалото од тракторот на кој се возат како сопатници.
На фармите во САД годишно загинуваат повеќе од 100 деца, а 26.000 се сериозно повредени. Тракторите се одговорни за 41% од загинувањата на децата на возраст под 15 години, при што четири од пет деца од земјоделските фамилии возат трактор. Возењето трактор со родители се смета за дел од земјоделската традиција. Детската безбедносна мрежа во земјоделството (The Childhood Agricultural Safety Network – CASN) ја согледалa опасноста и го промовира строгото правило – дете помало од 12 години никогаш не смее да се качи на трактор.
Запомнете: полесно е да закопаш традиција отколку дете!
Поради различните работни операции и различните работни машини кои учествуваат во работата на фармите е утврдено дека децата на фармите се за два до три пати повеќе изложени на опасности (несреќи) од други лица.
На фармата како заокружена целина, обично е поголемо засолниште за децата просторот каде што се сместени работилници и складишта. Овие места се од интерес на децата и таму се одвива нивната игра и истражување. Исто така, овие објекти се и потенцијална опасност за повреди и несреќи, повеќе за децата, отколку за возрасните.
Децата на фармите често се наоѓаат во близина на тракторот. Возачот на тракторот од своето седиште, поради мртвите агли, не може под секој агол да ги забележи децата каде се наоѓаат. Мртвите агли притоа создаваат големи проблеми, особено ако се работи за поголема категорија на трактори кои имаат поголеми тркала.
Ако возачот на тракторот не е предупреден за присуството на деца, може да настане несреќен случај. Децата секогаш ги привлекува тракторот и работата што ја врши тој.
Препораки:
• Никогаш не треба да се претпоставува дека децата останале онаму каде што последен пат сме ги забележале;
• Децата треба да се држат под надзор од возрасно лице во работното подрачје;
• Треба да се биде претпазлив и да се изгаси моторот ако децата влезат во работното подрачје;
• Никогаш не треба да се носат деца на тракторот ако нема сигурносно место за седење. Можат да паднат, да бидат прегазени или да се мешаат во вашата контрола над машината;
• Никогаш не треба да се дозволува управување на трактор на деца, туку треба да биде под контрола на возрасно лице;
• Посебно треба да се внимава при движење на тракторот наназад – прво осигурете се дали областа е чиста;
• Тракторот треба да се паркира по можност на рамна површина. Треба да се избегнува паркирање на угорнина или удолнина.
проф. д-р Драги Таневски, Факултет за земјоделски науки и храна – Скопје
