Африканската кокошка или кај нас позната како бисерка е вистински чувар на дворовите од змии, гуштери, скакулци и други штетници. Таа има необичен глас со кој ги предупредува и другите жители во дворот дека се заканува опасност.
„Многу е интересна, убава и пријателски настроена кон останатата живина”, вели Љубомир Стојановски, кој 20 години ја одгледува оваа сорта на кокошки.
„За прв пат ги видов во населбата Ергеле при посета на мој пријател, кој исто така е голем љубител на животни и ми го објасни начинот на одгледување. На заминување, пријателот ми подари еден пар бисерки и така започна моето долгогодишно другарување со нив. Јас сериозно се нафатив да ги запознаам нивните карактеристики и да ги одгледувам со посебна љубов”, објаснува Стојановски.
Бисерките се чуваат во јато од 5 до 10, а на еден мажјак се чуваат 2-3 женки. Бисерката е тешка околу 1,5 килограми, а на секој пердув има бела точка како бисер по што го добила името бисерка. Женката носи 25-30 јајца годишно. Инкубацијата трае 27-29 дена. Јајцата имаат тврда лушпа и женката треба да има вода во близина за да не се запечат јајцата. Друга карактеристика е тоа што ги кријат јајцата, па е тешко да се најдат.
„Ако нема некоја од женките, очекувајте дека таа ќе се појави со 10-15 млади. Најтешко е распознавањето на половите. Мажјакот има црвени реси и ги носи како обетки, додека кај женката се припиени кон вратот и се помали. Бисерките имаат „рокче” така што мажјакот меѓу двете реси има темновиолетова кожичка веднаш под клунот кај вратот којашто е карактеристична само за мажјаците”, објаснува Љубомир.
Цената на бисерките се движи од 10 евра за обичните и 20 евра за белите, а јајцето се купува за едно евро. Бисерката има најјако јајце во споредба со другата живина.
„Ако се пуштени, спијат на дрво, летаат праволиниски како фазанот, од 50 до 100 метри. Брзо трчаат и можат да одат до пет километри во далечина”, вели Љубомир кој истакнува дека покрај сите полезни карактеристики што ги имаат, тие претставуваат вистински одмор за очите.
Напишете коментар