Доколку размислувате да инвестирате во нов овошен насад, наша препорака е тоа да биде насад со јаткасти плодови, конкретно бадем. Причините се неколку- полесни за одржување во однос на другите овошни култури како праски или јаболка, потоа поголема побарувачка на пазарот како за конзумација така и за преработка и на крај подолг рок на траење после берба.
Поради брзата дехидрација на бадемовото стебло во првите две години треба да се има предвид дали местото каде е предвиден насадот има вода за наводнување и секако да се направи анализа на почвата.
Во зависност од тоа дали има или не наводнување се определува подлогата и тоа ГФ ако има наводнување со моментална цена од 2.80 евра и дива подлога на места каде нема наводнување по цена од 2.10 евра.
Сорти кои се предвидени за засадување во Македонија се нови сорти со доцно цветање поради честа појава на доцни мразеви. За површина од 1 ха потребни се 400 садници со поставување на одалеченост 4×4 и тоа на претходно обработена и наѓубрена површина.
Ги препорачуваме грчки садници на италијанска подлога произведени во овоштарскиот регион Вериа.
-Произведуваме по 200 000 садници праска, кајсија и 50 000 бадем. Со GFподлога со потекло од Италија, прочистени од болести. Наши клиенти се големи и мали производители и продаваме и на пазарите во Бугарија, Мароко, Јордан. Произведуваме и по 100 000 садници круша, јаболко и по 50 000 сливи. Секогаш работиме со нови сорти а патентите ги купуваме од разни центри низ Европа и Америка – вели сопственикот Стратос Ставроу.
Карактеристично во овој расадник е следењето на новите модерни технологии на производство и сорти кои се бараат на странските пазари. Исто така испитувањата се прават и за влијанието на климатските промени како и однесувањето на сортите кон болести и штетници.
При копањето на отвор за садник во почвата треба да се води сметка да не се отвара со сврдел за да не доаѓа до цементирање на отворот и во тој случај кореновиот систем нема да може да се шири и би дошло до сушење на садникот.
Кога се припрема почвата се употребува ѓубриво со висок процент на органски материи и фосфор. Кога насадот е конвенционален во текот на вегетација би имало 5-6 третирања, а кога имаме органски насад во зависност од временските услови третирањата би достигнале до 8 во текот на вегетација.
Исто како и кај сите овошки и бадемот има потреба од ѓубрење, прихрана и заштита во текот на вегетацијата.
Првиот род се очекува после тертата година а после четвртата година се очекува род од 25 килограми по садник.
Доколку производителот се определи да има органско производство тогаш исплатливоста е поголема затоа што субвенциите од државата се повисоки, а цената на органскиот бадем достигнува и до 13 евра за 1 килограм.
Начинот на производство на органски бадем е според програма за заштита и прихрана која може да претрпува промена зависно од временските услови. Во секој случај органското производство бара поголема ангажираност околу насадот.
Важно за производителите е информацијата за висината на субвенциите кои ги дава државата за подигнување на насадор и за одржување.
За подигнување на нов овошен насад е мерка преку ИПАРД при што држвата ви враќа 60% од инвестицијата.
За одржување за насад со бадеми субвенцијата е 30 000 денари од хектар за овошарник од 1 до 5 хектари. За сите други е 25 000 денари од хектар.
За органско дополнитени 70 % од претходниот износ.
Вложувањето во агрокомплексот во моментов е најсигурната инвестиција за сите што планираат да имаат сопствен бизнис или да го развијат постојниот. За земјоделците и агробизнисмените мотив плус да вложуваат во зголемување на производството.
Кризата со вирусот COVID -19 покажа дека производството на храна е најдоходовен бизнис, а руралниот развој перспективна гранка за која и Европската унија покажува голем интерес преку фондови и неповратни финансиски средства.
Владата на Република Северна Македонија преку разни програми нуди можности за започнување на семејни агробизниси и за модернизирање и зголемување на производството на храна преку домашни и ЕУ фондови.
Апликациите можете да ги подготвувате и сами, но комплицираноста на постапката и обезбедувањето на потребната документација, бара стручност и знаење за да бидете сигурни дека ќе се прифати вашата апликација.
