Работите на нивите воопшто не се физички лесни, а покрај тоа, тие можат да бидат многу опасни ако вниманието „одлета“ само неколку секунди. Последиците, за жал, понекогаш се и трагични. Совет за земјоделците е, пред сѐ да бидат одморени, наспани и сконцентрирано да пристапат кон работата, и секако, да ја проверат состојбата на машината пред да ја користат.
Дарко Маринковиќ од селото Неменикуче од Младеновац, кој со години обработува земјиште, посочува дека најопасна механизација се берачите на пченка, а последиците се главно губење на прсти, па дури и на цела рака.
Несреќи поради замор
Затоа, напоменува Маринковиќ, ако се слуша чукање, тресење, најпаметно е прво да ја исклучите машината и тогаш да проверите што не е во ред.
„Ако лицето е во трактор, нема да се повреди. Ама ако излезе од него и не го исклучи, последиците можат да бидат големи и опасни“, вели Маринковиќ.
Заморот, додава тој, е уште еден фактор што предизвикува несреќи.
„На пример, пченката најчесто се бере ноќе поради влагата и росата за да се исчисти подобро, а концентрацијата, ако сме работеле цел ден, може да се намали во текот на ноќта.“
Други луѓе не треба да бидат во близина на машината во функција
Тој, исто така, посочува дека заштитната опрема не треба да се отстранува, а тоа земјоделците често го прават и дека заштитата може да ги спаси во моментите кога ќе се случи несреќа.
„Ако, на пример, се работи за косилка на која ѝ е отстранета церадата и ако таа во тревата закачи камен, тој камен може да одлета и да повреди некого на растојание од 20 метри. Ако испадне ротирачкиот диск, тој може да одлета и подалеку.“, посочува Маринковиќ и смета дека е најдобро други луѓе да не се во близина на машините што се во функција.
Според него, најопасните се оние што имаат ротирачки делови што се користат за сечење, ситнење, кршење.
„Потешко е некој да се повреди со плуг, но со косилки има поголема можност. Сѐ што работи преку кардани и има ножеви и делови што брзо ротираат е многу ризично“.
Пред употреба, самата машина треба да се провери, но тој заклучува дека повредите почесто се случуваат почесто поради пад на концентрацијата и непрофесионално ракување отколку поради дефекти.
Кога станува збор за тракторите, прво треба да проверите дали имаат доволно масло, вода, гориво и дури потоа да влезете внатре, советува Јован Негован од здружението Панчевачки земјоделци.
„Несреќите често се случуваат при брзање. Земјоделците, поради временските услови, брзаат да ја завршат работата, на пример, пред дождот и не обрнуваат внимание на сите овие елементи. Токму во овие бурни моменти најчесто се случуваат повреди.“
Тој додава дека надвор од механизацијата, на терен, секогаш треба да има барем уште едно лице за да може да му помогне на операторот на машината во случај на какви било проблеми, но нагласува дека не треба да стои зад тракторот/комбајнот.
„Треба да биде на доволно растојание. Тоа значи најмалку пет до 10 метри, а понекогаш и 30 метри. Најопасно е кога стои зад самата механизација“, посочува Негован.
Не влегувајте во кабината на трактор или на комбајнот со запалена цигара
Пензионираната пожарникарка Љубица Крњаиќ додава дека е многу важно да се одржува механизацијата во исправна состојба, особено во летните месеци кога имаме топли денови, високи температури и топол воздух, што го отежнува ладењето на уредот.
„Количината на прашина што се создава за време на бербата или собирањето плодови се акумулира долж деловите што се прегреваат. Кај ротирачките елементи, загревањето е побрзо ако лежиштата се слабо подмачкани. И кога горивото се разлева на делот каде што се собира прашината, се прегрева од топлиот воздух“, објаснува Крњаиќ.
Таа напоменува дека никогаш не треба да влегувате во трактор или во комбајн со запалена цигара, а уште помалку да ги фрлате отпушоците надвор. Во спротивно, лесно може да настанат пожари, а запалените остатоци од растенија, исто така, можат да го загрозат животот, бидејќи огнот брзо се шири и честопати е неконтролиран.
Извор: agroklub.rs
