Министерот за земјоделство Бранислав Недимовиќ во гостување во емисија за РТС изјави дека Саудиска Арабија го отвора својот пазар за земјоделски производи од Србија, како и дека се водат преговори со двајца големи инвеститори кои се занимаваат со преработка на пченка.
„Вчера ни беше потврдено дека Саудиска Арабија го отвора својот пазар за земјоделски производи од Србија – говедско, јагнешко, млеко и млечни производи, а потпишавме договор и со Индонезија, тие отвораат прво за јаболка, за пченка, а потоа продолжуваме кон нови пазари“, рече Бранислав Недимовиќ.
Недимовиќ тврди дека и годинава ќе има храна во Србија, а посочува дека лани е забележан рекорден извоз од пет милијарди долари.
Деновиве во српските медиуми се споменуваше дека кинеска компанија ќе инвестира во преработка на пченка, а министерот Недимовиќ вели дека се преговара со двајца големи инвеститори – еден од Египет и еден од Кина.
„Двете држави се занимаваат со преработка на пченка и производство на гликоза, некои сирупи и производи за фармацевтската индустрија. Тоа се финалните премиум производи од пченката. Нивната идеја е да се преработат околу половина милион тони пченка. Тоа се сериозни работи“, посочува Недимовиќ.
Тој вели дека министерот за земјоделство на Египет најавил дека во март ќе дојде во Србија токму поради реализацијата на таа инвестиција.
„Тоа е многу добро затоа што веќе не мораме да продаваме суровини, туку правиме полупроизвод или финален производ кој е многу поскап. Тоа е целта на земјоделството“, посочува Недимовиќ.
Недимовиќ истакна дека има и конкурси кои се отворени за набавка на роботи за молзење, кои луѓето ги бараат поради недостаток на работна сила. Тој посочува дека за прв пат на пазарите, плоштадите и улиците ќе има млекомати со свежо млеко од фармите.
Во однос на претстојната сеидба посочи дека е обезбедено семе за сеидба и дека нема причина за загриженост.
„Што се однесува до пченката и другите култури кои одат на пролет, не грижете се, ние имаме сопствено производство и немаме никакви проблеми“, нагласува Недимовиќ.
