Познатиот глумец Леонардо Дикаприо е добитник на многу филмски награди, но неговото последно признание доаѓа од група меѓународни научници од лондонската Кралска ботаничка градина Кју и Националниот хербариум на Камерун, кои му оддадоа почит на холивудскиот актер и еколошки активист со именување на нов вид тропско дрво по него.
Uvariopsis dicaprio доаѓа од шумата Ебо во Камерун, се наведува во соопштението за печатот во кое беше објавена веста за новото тропско дрво. Ова зимзелено дрво со големи жолтеникаво-зелени цветови е првото дополнување на листата на нови видови за 2022 година од страна на лондонската Кралска ботаничка градина.
Една од најголемите релативно недопрени прашуми во централна Африка е дом на народот Банен и уникатна флора и фауна, вклучувајќи загрозени горили, шимпанза и шумски слонови. Во ботаниката, растенијата често се именувани по научници кои покажале посветеност на полето на истражување. Леонардо Дикаприо го привлече вниманието на клучната област на биолошката разновидност на Јабаси кога минатата година беше загрозена од концесијата за сеча.
„Шумата Ебо и сите неверојатни животни што живеат таму се во неволја. Тоа ги вклучува шумските слонови, горили, шимпанза и многу други. Да помогнеме да се спаси шумата Ебо“, напиша актерот на Твитер во август 2020 година. Еден месец подоцна, владата на Камерун ја укина концесијата за сеча.
„Ја цениме поддршката што Лео ни ја даде во минатогодишната кампања за зачувување на Ебо, па се чинеше соодветно да му оддадеме почит на овој начин, именувајќи го видот единствен само за оваа шума, по него“, рече Мартин Чик, научник од RBG Kew кој беше вклучен во истражувањето.
„Да продолжеше концесијата за сеча, веројатно ќе го загубевме овој вид поради сечата, земјоделството и палењето што вообичаено следи по концесиите за сеча.“, рече тој.
Uvariopsis dicaprio е критично загрозен вид бидејќи е населено во незаштитено шумско живеалиште кое е изложено на опасности, вклучително и сеча и рударство.
